ކުރީ ސަރުކާރުން ޑޮމެއިން ވިއްކުން ހުއްޓާލާފައި އޮތްއޮތުން ނިމުމަކަށް ގެނެސް، މި ސަރުކާރުން އެ މަސައްކަތް ފެށުމަށް ނިންމައިފިއެވެ.

މިއަދު އޮތް ނޫސްވެރިންގެ ބައްދަލުވުމުގައި މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން މުޙައްމަދު އަމީން ވިދާޅުވީ، އެ މައްސަލައިގައި މިހާރު މިނިސްޓްރީން ގޮތްތަކެއް ނިންމާފައިވާކަމަށެވެ.

މިނިސްޓްރީއާ ޙަވާލުވެވަޑައިގެންނެވިއިރުވެސް 200 ވަރަކަށް ޑޮމެއިންގެ ޚިދުމަތަށް އެދިފައި އޮތްކަން ފާހަަގަ ކުރައްވައި އަމީން ވިދާޅުވީ، ސައްޙަ ގޮތުގައި ހުރި ޑޮމެއިން ނަގާފައިވާ މީހުންނަށް އެ ޚިދުމަތް ލިބެންޖެހޭކަމަށެވެ.

Advertisement

ވެރިފިކޭޝަން ޕްރޮސެސްގެ ތެރެއިން ޑޮމެއިން ދޫކުރުމުގެ ޚިދުމަތް މި ސަރުކާރު އައިސް އަލުން ފަށާފައިވާކަންވެސް އަމީން ފާހަގަ ކުރެއްވިއެވެ.

އަމީން ވިދާޅުވީ، ޑޮމެއިންގެ ޚިދުމަތަކީ އަލުން ފަަށަންޖެހޭ ޚިދުމަތެއް ކަމަށާއި، ކުރިއަށް އޮތް ދެތިން މަސް ތެރޭގައި އެ ޚިދުމަތް އަލުން ފަށާނެ ކަމަށެވެ. އެކަން ކުރާނީ ޒަމާނަށް ފެތޭ ގޮތަށްކަމަށް އަމީން ވިދާޅުވިއެވެ.

އެއްގަމު އުޅަނދުގައި ރަޖިސްޓްރީ ނަންބަރުގެ ބަދަލުގައި ވަކި ނަންބަރެއް ނުވަތަ ނަމެއް (ޑޮމެއިން) ބޭނުންކުރަން ބޭނުންވާ ފަރާތްތަކަށް ޑޮމެއިން ދޫކުރުމާއި، ވިއްކުމާއި، ބަދަލުކުރުމާއި، އަގު ކަނޑައެޅުމާއި، ބޭނުން ކުރުމުގެ ހަމަތައް ކަނޑައަޅާފައިވާ ޤަވާއިދެއް އޮވެއެވެ. އެއީ "އެއްގަމު އުޅަނދުގައި ޑޮމެއިން ބޭނުން ކުރުމުގެ ޤަވާއިދު" އެވެ.

އެ ޤަވާއިދުގެ 6 ވަނަ މާއްދާގައި ޑޮމެއިން ވިއްކުމާގުޅޭ މައްސަލަ ޙައްލުކުރުމަށް ކޮމިޓީއެއް ކަނޑައަޅާފައި އޮންނަންވާނެކަމަށް ބަޔާންކޮށްފައިވެއެވެ.

އަދި ޤަވާއިދުގެ 7 ވަނަ މާއްދާގައި ޑޮމެއިން ވިއްކަންވާނީ ވިއްކުމުގެ ކުރިން އާންމުކޮށް އިއުލާނުކޮށް، އެންމެ މަތިން އަގު ހުށަހަޅާ ފަރާތަކަށްކަމަށް ބަޔާންކޮށްފައިވެއެވެ.