ޔަހޫދީ ފައުޖުތަކުން ދިން ޙަމަލާއެއްގައި ޣައްޒާގެ ޚާން ޔޫނިސްގައި ހުންނަ ފަލަސްޠީނުގެ ރެޑް ކްރެސެންޓް ޖަމުޢިއްޔާގެ ޢިމާރާތް ސުންނާފަތިކޮށްލައިފިއެވެ. އެ ޙަމަލާގައި ފަސް މީހުން ޝަހީދުވެ އެތައް ބަޔަކު ވަނީ ޒަޚަމުވެފައެވެ.

ރެޑް ކްރެސެންޓުގެ ޢިމާރާތުގައި އެ ޖަމުޢިއްޔާގެ މައި މަރުކަޒާއި އަލްޢަމާލް ހަސްފަތާލާއި ހޮޓަލަކާއި ޚާއްޞަ އެހީއަށް ބޭނުންވާ މީހުންނަށް ޚާއްޞަކޮށްފައިވާ ޢިމާރާތެއް ވެސް ހިމެނެއެވެ. އޮކްޓޫބަރު މަހުގެ ހަތް ވަނަ ދުވަހުން ފެށިގެން ޣައްޒާގައި ހިނގަމުންދާ ހަނގުރާމައިގައި ގެދޮރު ގެއްލިފައިވާ ފަލަސްޠީނުގެ 14،000 މީހުން ވެސް އެ ޢިމާރާތުގައި ދިރިއުޅެއެވެ.

ވޭތުވެދިޔަ 24 ގަޑިއިރުގެ ތެރޭގައި ޔަހޫދީން ވަނީ ފަލަސްޠީނުގެ 207 މީހުން ޝަހީދުކޮށްލައިފައެވެ. އެއާއެކު އޮކްޓޫބަރު މަހުގެ ހަތް ވަނަ ދުވަހުން ފެށިގެން ޔަހޫދީ ފައުޖުތަކުން ޣައްޒާގެ އާންމުންނަށް އަމާޒުކޮށް ދެމުންގެންދާ ޢުދުވާނީ ޙަމަލާތަކުގައި ޝަހީދުކޮށްލައިފައިވާ މީހުންގެ ޢަދަދު 22،185އަށް ވަނީ އަރައިފައެވެ.

Advertisement

ރެޑް ކްރެސެންޓު ޢިމާރާތަށް ދިން ޙަމަލާ ދުނިޔޭގެ ސިއްޙަތު ޖަމުޢިއްޔާއިން ވަނީ ކުށްވެރިކޮށްފައެވެ. އެ ޖަމުޢިއްޔާގެ އެންމެ އިސްވެރިޔާ ޓެޑްރޯސް އަދަނޮމް ގެބްރިޔޭސުސް ވިދާޅުވި ގޮތުގައި ޣައްޒާގައި ހުންނަ ފަލަސްތީނުގެ ރެޑް ކްރެސެންޓް ޖަމުޢިއްޔާގެ މައި މަރުކަޒަށް ދިން ޙަމަލާއަކީ ޤަބޫލުކުރެވޭ ކަމެއް ނޫނެވެ.