ރަތް ކަނޑާއި ޚަލީޖް ޢަދުންގައި ދަތުރުކުރާ އާގުބޯޓުފަހަރުތަކަށް ދޭ ޙަމަލާތައް ހުއްޓައިލުމަށް ޔަމަނުގައި ޙަރަކާތްތެރިވާ ހަތިޔާރުއެޅި ޙޫޘީން ޖަމާޢަތަށް އދގެ ސަލާމަތީ މަޖިލީހުގެ މެމްބަރުން ގޮވައިލައްވައިފިއެވެ. އެއީ ޤާނޫނާ ޚިލާފު އަދި ސަރަޙައްދީ ހަމަޖެހުމާއި ދަތުރުފަތުރުގެ މިނިވަންކަން ގެއްލި، މުޅި ދުނިޔެއަށް ކާބޯތަކެތި ފޯރުކޮށްދިނުމަށް ދަތިވާ ކަމެއް ކަމަށް ސަލާމަތީ މަޖިލީހުން ބުނެއެވެ.

ސަލާމަތީ މަޖިލީހުގެ މެމްބަރުން އެ ގޮތަށް ގޮވައިލައްވައިފައި ވަނީ މި އަހަރުގެ ފުރަތަމަ ރަސްމީ ބައްދަލުވުމުގައެވެ. އެ ބައްދަލުވުމުގައި މެމްބަރުން ވަނީ ނޮވެމްބަރު 19 ވަނަ ދުވަހު ޙޫޘީން ހިފަހައްޓައިފައިވާ ޔަހޫދީންނާ ގުޅުން އޮތް ޖަޕާނުގެ މުދާ އުފުލާ ބޯޓު ގެލެކްސީ ލީޑަރު ވެސް ދޫކޮށްލުމަށް ޙޫޘީންނަށް ގޮވައިލައްވައިފައެވެ.

ޙޫޘީންގެ މިސައިލާއި ޑްރޯން ޙަމަލާތައް ހުއްޓުވުމަށް ފިޔަވަޅު އެޅުމަށް ބައެއް މެންބަރު ޤައުމުތަކުން ސަލާމަތީ މަޖިލީހުގައި އެދުނު ނަމަވެސް އެ ބައްދަލުވުމުގައި ޙޫޘީންނާ ދެކޮޅަށް ރަސްމީކޮށް އެއްވެސް ފިޔަވަޅެއް އެޅުމަށް ނިންމާފައެއް ނުވެއެވެ. އެ ބައްދަލުވުމުގައި ބައިވެރިވި އެމެރިކާއާއި އިނގިރޭސިވިލާތާއި ޔަހޫދީންގެ މަންދޫބުން ވަނީ ޙޫޘީންގެ ޙަމަލާތަކަށް އީރާނުން ތާއީދުކުރާ ކަމަށް ތުޙުމަތުކޮށްފައެވެ. ނަމަވެސް އީރާނުން ވަނީ އެ ކަން ދޮގުކޮށްފައެވެ.

Advertisement

އޮކްޓޫބަރު މަހުގެ ހަތް ވަނަ ދުވަހުން ފެށިގެން ފަލަސްޠީނުގެ ޣައްޒާގައި ކުރަމުންދާ ހަނގުރާމައިގައި ފަލަސްޠީނަށް ތާއީދުކުރުމުގެ ގޮތުން ޔަހޫދީންގެ ރަށްތަކަށް ރަތް ކަނޑުން ދަތުކުރުކުރާ ކޮންމެ ބޯޓަކަށް ޙަމަލާދޭނެ ކަމަށް ޙޫޘީން ވަނީ ބުނެފައެވެ. ޙޫޘީންގެ ޙަމަލާތަކުން ބޯޓުތައް ރައްކާތެރިކުރުމަށް އެމެރިކާއިން އިސްނަގައިގެން ޙަރަކާތްތަކެއް ވަނީ ފަށައިފައެވެ. އެ ގޮތުން ކަނޑުގެ ސިފައިންގެ ޓާސްކު ފޯހެއް މިދިޔަ މަހު ވަނީ އެކުލަވައިލައިފައެވެ.