އިސްރާއީލު ނަމަކަށް ކިޔާ ޔަހޫދީ ޒަޔަނިސްޓް ދައުލަތުން އަމިއްލަ ދިފާއުގައި ބިނާކޮށްފައިވާ ހުރިހާ އަސާސީ ތަނބުތަކެއް ޙަމާސްގެ އަލްޤައްސާމް ބްރިގޭޑްގެ މުޖާހިދުން މުގުރާލައިފިކަމަށް އަލްމަޔަދީން ވެބްސައިޓުގެ ރިޕޯޓެއްގައި ހާމަކޮށްފި އެވެ.

މަޝްހޫރު ލިޔުންތެރިޔާ ރޮބަޓް އިންލަކޭޝް އަލްމަޔަދީންގައި ލިޔުއްވާފައިވާ ގޮތުގައި މުޖާހިދުން ދެމުންދާ ހަމަލާތަކުގެ ސަބަބުން އިސްރާއީލު ދަނީ އަދިވެސް އިތުރަށް ބަލިކަށިވަމުންނެވެ. 7 އޮކްޓޯބަރު 2023ގައި ޙަމާސްއިން އިސްރާއީލަށް ދިން "ޠޫފާނުލް އަޤްޞާ" ނަމަކަށް ކިޔުނު ހަމަލާއަށްފަހު މިހާތަނަށް ޔަހޫދީ ސިފައިންގެ 1000 އެއްގަމު އުޅަނދަށް ހަމާދީ ދެން ބޭނުން ނުކުރެވޭވަރަށް ވަނީ ހަލާކުކޮށްލާފަ އެވެ. މި ހަމަލާތަކާއެކު އިސްރާއީލު ސިފައިންގެ ތެރެއިން 5000 މީހުންނަށް ސިދާކޮށް ހަމަލާ ދެވިފައިވާކަމަށް ޤައްސާމް ބްރިގޭޑްގެ މުޖާހިދުން ވަނީ ހާމަކޮށްފަ އެވެ. އިސްރާއީލުން އެއްލައްކަ ފަސްދޮޅަސް ހާސް ސިފައިން ބަރު ހަތިޔާރާއެކު ޤައްޒާއަށް ފޮނުވައިގެން ހަނގުރާމަކުރަމުންދިޔަ ކަމުގައި ވިޔަސް ޔަހުދީން ބޭނުންވި އެއްވެސް އަމާޒެއް ހާސިލުކުރެވިފައި ނުވެއެވެ. މިހެންކަމުން އިސްރާއީލުގެ އަނިޔާވެރި ބޮޑުވަޒީރު ބެންޖަމިން ނަތަންޔާހޫ ޣައްޒާއަށް ފޮނުވާފައި ތިބި ޔަހޫދީ ސިފައިން އެތަނުން ނެރެގެން ގެންދަން އިންކާރުކުރަމުންދާ ކޮންމެ ދުވަހަކު ސިފައިން ވަޅުލާނެ ކަށްވަޅުކޮނުން ނޫންކަމެއް އިސްރާއީލަށް ނެތްކަމަށް އަލް މަޔަދީންގެ ރިޕޯޓްގައި ބަޔާންކޮށްފައި ވެއެވެ.

ޔަހޫދީ އިސްތިޢުމާރީ ސިފައިންނަށް ފަލަސްޠީނުގެ މުޖާހިދުން ދެމުންދާ ހަމަލާތަކުން ލިބެމުންދާ ގެއްލުންތައް ބޮޑުކަމުން އެމީހުންނަށް ގޮތްހުސްވެފައި ވާތީ އައިސްފައިވާ ރުޅިން ޣައްޒާއަށް ބޮންއެޅުން ނޫންކަމެއް ކުރެވެމުން ނުދެއެވެ. ނަތީޖާއެއްގެ ގޮތުން ފަލަސްޠީނު ރައްޔިތުންގެ ތެރެއިން 29000 މީހުން ވަނީ ޝަހީދުވެފަ އެވެ. މަރުވި މީހުންގެ ތެރޭގައި 11000 ކުޑަކުދިން ހިމެނޭކަން ވަނީ އެނގިގެން ގޮސްފަ އެވެ.

Advertisement

ޣައްޒާގައި ހުންނަވާ ޙަމާސްގެ ޒަޢީމު ޔަޙުޔާ ސިންވާރު ފަލަސްޠީނުގެ އިސް ބޭފުޅުންނަށް ފޮނުއްވި ސިޓީއެއްގައި ލިޔުއްވާފައި ވަނީ 5000 ޔަހޫދީ ސިފައިންނަށް އަމާޒުކޮށް ސީދާގޮތެއްގައި ހަމަލާދެވިފައިވާއިރު މީގެ ތެރެއިން ތިންބައިކުޅަ އެއްބައި ސިފައިން ވަނީ މަރުވެފައިކަމަށެވެ. މިގޮތުން ބަލާއިރު މަދުވެގެން ވެސް 1666 ޔަހޫދީ ސިފައިން މަރާލެވިފައިވާކަމަށް ސިންވާރުގެ ސިޓީގައި ބަޔާންކުރައްވާފައި ވެއެވެ. ނަމަވެސް މިކަންކަމުގެ މައްޗަށް އިސްރާއީލުން އެއްބަސްވެފައި ނުވާކަމަށާއި މަރުވެ އަދި ޒަޚަމްވަމުންދާ ސިފައިންގެ އަދަދު ސިއްރުކުރަމުންދާކަމަށް އަލްމަޔަދީންގެ ރިޕޯޓުގައި ފާހަގަކޮށްފައި ވެއެވެ.