ވަރަށް ކުރީ ޒަމާނެއްގައި އިބްރާހީމްގެފާނު، އެކަލޭގެފާނުގެ އަބިކަނބަލުން، ޙާޖަރުގެފާނާއި ދަރިކަލުން އިސްމާޢީލްގެފާނު އަރަބިކަރައިގެ ވާދީއެއްގައި ވަޒަންވެރިކުރެއްވިއެވެ. އެއީ ވަރަށް އެކަނިވެރި ވާދީ އެކެވެ. ދެން އެތަނުގައި ﷲ ޒަމްޒަމް ފެން ލެއްވެވިއެވެ. ދެން މަދުމަދުން މީސްތަކުން އެތަނަށް އައިސް ދިރިއުޅެން ފަށައިފިއެވެ. މަޑުމަޑުން އެތަން ކުޑަ ކުޑަ އަވަށަކަށް ބަދަލުވެއްޖެއެވެ. އެތަނަށް ފަހުން މައްކާ އޭ ކިޔަން ފަށައިފިއެވެ.

އެރަށުގައި ހުންނަވައި އިސްމާޢީލްގެފާނު ވަރަށް ރިވެތި ޒުވާނަކަށް ވެވަޑައިގެންފިއެވެ. ބޮޑުފުޅުވެއްޖެއެވެ. އެކަލޭގެފާނު ބޮޑުފުޅުވީތަނާ، ﷲ އިބްރާހީމްގެފާނަށް ކަޢުބާ ނުވަތަ ގެފުޅެއް ބިނާކުރައްވަށް އަމުރުފުޅު ކުރެއްވެވިއެވެ. އެއީ ބިންމަތީގައިވާ ﷲ ގެ ގޮޅެކެވެ.

ދެން އެދެބަފައިކަލުން، އެތާނގެ ފަރުބަދަތަކުން ހިލަތައް ނަންގަވައިގެން އެ ގެފުޅު ހައްދަވަން ފައްޓަވައިފިއެވެ.

އެތަން ބިނާކުރެއްވަމުން އިބްރާހީމްގެފާނު ﷲ އަށް ދުޢާފުޅު ކުރެއްވެވިއެވެ. ހައްދަވާ ބޮޑުކުރެއްވި ރަސްކަލާކޮ! މިރަށަކީ އަމާންތަނެއްކަމުގައި ލައްވާނދޭވެ! މިރަށަކީ ތިޔާގި ބޭވާލިބޭ ރަށެއްކަމުގައި ލައްވާނދޭވެ! އެންމެ ފަހު ދުވަހަށްވެސް މިރަށުގެ މީސްތަކުންނަކީ އީމާންވެގެންވާ ބަޔަކުކަމުގައި ލައްވާނދޭވެ!

ދެން އިބްރާހީމްގެފާނާއި އިސްމާޢީލްގެފާނު ގެފުޅުގެ ފުރަތަމަ ހިލަކޮޅު ބޭއްވުމަށްފަހު ދުޢާފުޅުކުރެއްވެވިއެވެ. ހައްދަވާބޮޑުކުރެއްވި ރަސްކަލާކޮ! އަޅަމެންގެ ކިބައިން މިކަން ޤަބޫލުކުރައްވާނދޭވެ! އިބައިލާހަކީ އައްސަވާވޮޑިގެންވާ އަދި ބައްލަވާވޮޑިގެންވާ ރަސްކަލާނގެއެވެ.

ދެން އިބްރާހީމްގެފާނު ދުޢާފުޅު ކުރެއްވެވިއެވެ. ހައްދަވާބޮޑުކުރެއްވި ރަސްކަލާކޮ! އަޅަމެންނީ އިބައިލާހަށް ސަޖިދަ ޖަހާ ބަޔަކު ކަމުގައި ލައްވާނދޭވެ! އަދި އަޅަމެންގެ ދަރިފަސްކޮޅުކުރެވެސްމެއެވެ. އަޅަމެންނަށް އަޅުކަން ކުރަންވާގޮތް ދައްކަވާނދޭވެ!

ދެން އަނެއްކާވެސް އިބްރާހީމްގެފާނަށް ﷲ އަމުރުފުޅު ކުރައްވައިފިއެވެ. އެ ގެފުޅު ސާފު ކުރެއްވުމަށްފަހު މީސްތަކުންނަށް ޙައްޖަށް އައުމަށް އަންގަވާށެވެ.

ދެން އޭގެ ފަހުން ހުރިހާ މުސްލިމުތަކުންނަށް ޙައްޖު ފަރުޟު ކުރެވިއްޖެއެވެ.

މިއަދު ދުނިޔޭގެ އެކި ކަންކޮޅުތަކުން 20 މިލިއަން މީހުން ކޮންމެ އަހަރަކު ޙައްޖުގެ އަޅުކަން އަދާކުރެއެވެ.

މި ލިޔުމަކީ ތަރުޖަމާކޮށްފައިވާ ލިޔުމެއް | ތަރުޖަމާކުރީ: ޙަސަން ޢައްސާން