މި މަހުގެ މިހާތަނަށް ބޭސްފަރުވާއަށް ދާން 1922 ޓިކެޓު ދޫކޮށްފައިވާ ކަމަށް އެންސްޕާގެ ސީއީއޯ ހީނާ ވަލީދު ވިދާޅުވެއްޖެ އެވެ.

ހީނާ އެކްސްގައި ކުރެއްވި ޕޯސްޓެއްގައި ވިދާޅުވީ ބޭސްފަރުވާ ކުރުމަށް އެދި ހުށަހަޅާ ފަރާތްތަކަށް އެ އޮންނަ އުސޫލުގެ ތެރެއިން އެކަން ހަމަޖައްސައި ދެނީ އެންސްޕާ އަދި އާސަންދައިން ކަމަށާއި އެކޭސްތަކަށް ރައީސުލްޖުމްހޫރިއްޔާ އިރުޝާދު ދެއްވާ އުސޫލެއް ނޯންނަ ކަމަށެވެ.

އެގޮތުން އިއްޔެގެ ނިޔަލަށް ބޭސްފަރުވާއަށް ދިޔުމަށް 1922 ޓިކެޓް ދޫކޮށްފައިވާ ކަމަށާއި އޭގެ 97.2 އިންސައްތަ އަކީ ބޭސްފަރުވާއަށް އިންޑިއާއަށް ދިއުމަށް ދޫކޮށްފައިވާ ޓިކެޓު ކަމަށް ހީނާ ވިދާޅުވި އެވެ.

Advertisement

އާސަންދަ ސްކީމްގެ ދަށުން ބޭސްފަރުވާ އަށް ރާއްޖެއިން ބޭރަށް ބަލިމީހުން މިވަގުތު ފޮނުވަމުން ދަނީ ހަމައެކަނި އިންޑިއާ އަދި ސްރީލަންކާ އަށް ނަމަވެސް އެ ހިދުމަތް ތައިލޭންޑާއި ޔޫއޭއީ އަށް ފުޅާކުރަން ސަރުކާރުން ވަނީ ނިންމާފަ އެވެ. އެގޮތުން އާސަންދައިގެ ދަށުން ބޭސްފަރުވާ އަށް ދާ ފަރާތްތަކުގެ ހުރުމުގެ ހަރަދު ވެސް ހަމަޖައްސައިދޭން ސަރުކާރުން ވަނީ ނިންމާފަ އެވެ.