މާލޭގައި ހަށިވިއްކާ އަންހެނަކު ހައްޔަރުކޮށް ބަންދު މުއްދަތު ޖަހައިފިއެވެ.

ހަށިވިއްކާކަމުގެ ތުހުމަތުގައި މާލެއިން ހައްޔަރުކޮށްފައިވަނީ އުމުރުން 34 އަހަރުގެ ވިއެޓްނާމް އަންހެނެކެވެ.

އޭނާގެ ބަންދު މުއްދަތު ޖެހުމަށް އިއްޔަ ކޯޓަށް ގެންދިއުމުން ކޯޓުން ވަނީ އޭނާގެ ބަންދަށް 5 ދުވަހުގެ މުއްދަތެއް ދީފައެވެ. ބަންދަށް ކުރު މުއްދަތެއް ދީފައިވަނީ ތަރުޖަމާނަކު ނުލިބުމުން ތަރުޖަމާނަކާ ނުލައި ބަންދު މުއްދަތު މަޖިލިސް ކުރިއަށް ގެންގޮސްފައިވާތީ އެކަމުގެ މައްޗަށް ރިއާޔަތް ކޮށްކަމަށް ކޯޓު އަމުރުގައި ބުނެފައިވެއެވެ.

Advertisement

މި އަންހެން މީހާ ބަންދުގައި ބެހެއްޓުމަށް އަމުރު ކޮށްފައިވަނީ ކުށްކުރިކަމަށް ތުހުމަތު ކުރެވޭ މިންވަރަށް ހެކި ހުށަހަޅާފައި ހުރުމުން ކަމަށް ކޯޓު އަމުރުގައި ބުނެފައިވެއެވެ. އެގޮތުން މީނާ ހުރި ކޮޓަރިން، ޖިންސީ އަމަލު ހިންގަން ބޭނުންކުރާ ތަކެތި ފެނިފައިވާ ކަމަށާ މީގެން ބައެއް ތަކެތި ބޭނުންކޮށްފައިހުރިއިރު އަނެއްބައިތަކެތި ބޭނުން ނުކޮށްހުރި ކަމަށް ބުނެފައިވެއެވެ.

މީގެއިތުރުން އަންހެން މީހާ ހަށިވިއްކާ ކަމަށް އިއުތިރާފުވެފައިވާ ކަމަށްވެސް ބުނެފައިވެއެވެ. އަދި މީނާގެ އަތުން ފައިސާވެސް ފެނިފައިވާ ކަމަށާ، މި ފައިސާއަކީ މީނާ ހަށިވިއްކައިގެން ހޯދާފައިވާ ފައިސާކަމަށް ބުނެފައިވާކަމަށްވެސް ކޯޓު އަމުރުގައި ބުނެފައިވެއެވެ.

މާލޭން ހަށިވިއްކުމުގެ މައްސަލަތަކުގައި ދޭތެރެދޭތެރެއިން މީހުން ހައްޔަރުކުރެއެވެ.