އިސްރާއީލު ސިފައިން ހިފާފައިވާ ހުޅަނގު އައްސޭރީގެ ސިޓީއެއް ކަމަށްވާ ނަބްލޫސް އަށް ވަދެ ފަލަސްތީނުގެ ދެ ޒުވާނަކު ވަނީ މަރާލާފައެވެ.

މިއަދު ހެނދުނުގެ ވަގުތެއްގައި އިސްރާއީލުގެ ސިފައިން އެ ސިޓީއަށް ވަދެ އެ ދެ މީހުން ހޯދުމުގެ މަސައްކަތް ކުރިއިރު، އެކަކަކީ އަލް އަގްސާ ޝަހީދުންގެ ބްރިގޭޑްއާ ގުޅުން ހުރި މީހެއް ކަމަށް ރިޕޯޓް ތަކުން ބުނެއެވެ.

ފަލަސްތީނުގެ ނޫސް އެޖެންސީ ވަފާ އިން ބުނި ގޮތުގައި މިމީހުން ހޯދާފައިވަނީ ނަބްލޫސްގެ ގެއަކުންނެވެ. އެއަށްފަހު އިސްރާއީލުގެ ސިފައިން ލައުޑްސްޕީކަރުތައް ބޭނުންކޮށްގެން އެމީހުން އަމިއްލައަށް ހަވާލުވުމަށް ވަނީ ގޮވައިފައެވެ.

Advertisement

މިދެމީހުންނާއި އިސްރާއީލު ސިފައިންނާ ދެމެދު ކޮންމެވެސް ވަރެއްގެ ކުރިމަތިލުންތަކެއް ހިނގައި، ދެމީހުން ގަޔަށް ބަޑިޖަހައި ވަނީ މަރާލާފައެވެ.

މި 2 މީހުންނަކީ މި ހަފްތާގައި އިސްރާއިލް ފުލުހުންނާ ދެކޮޅަށް ބަޑިޖަހައި ހަމަލާ ދީފައިވާ 2 މީހުން ކަމަށް އިސްރާއީލުގެ އަސްކަރިއްޔާއިން ބުނެއެވެ.