ރައްޔިތުންގެ މަޖިލީހުގެ މެންބަރު ކަމަށް ޖުމްހޫރީ ޕާޓީގެ ޓިކެޓުގައި ވާދަކުރައްވާ އެޕާޓީގެ ނައިބު ލީޑަރު އައިޝަތް ނަހުލާ އަކީ ވަފާތެރި މެންބަރަކަށް ވާނެ ކަމަށް ޖޭޕީގެ ލީޑަރު ޤާސިމް އިބްރާހިމް ވިދާޅުވެއްޖެއެވެ.

ރައްޔިތުންގެ މަޖިލީހުގެ އިންތިހާބުގެ ފޯރި ގަދަވެފައިވާއިރު ނަހުލާ ޖޭޕީގެ ޓިކެޓުގައި ވާދަކުރައްވަނީ ހުޅުމާލޭ ދެކުނު ދާއިރާއަށެވެ.

ޤާސިމް އެކްސްގައި ކުރެއްވި ޕޯސްޓެއްގައި ވިދާޅުވީ، ނަހުލާ ޖޭޕީގެ ޓިކެޓުގައި މަޖިލީހަށް ވާދަކުރައްވަނީ، ދިވެހިރާއްޖޭގެ ސިޔާސީ މައިދާނުގައި އަންހެނުންގެ ބާރުވެރިކަން އިތުރުކޮށް، މަދަނީ، އިގްތިސާދީ އަދި އިޖްތިމާއީ ކަންކަމުގައި އަންހެނުންގެ ދައުރު ފުޅާކޮށް، ފުރުސަތުތައް ފަހިކުރުމުގެ މަތިވެރި އަޒުމުގައި ކަމަށެވެ.

Advertisement

"ޤާނޫން ހަދާ މަޖިލީހަކީ، އެމަޖިލީހަކަށް ތަޖުރިބާއާއި ހިކުމަތްތެރި، ވިސްނުންތެރި އަމާނާތްތެރިން އިންތިޚާބު ކުރާން ޖެހޭ ތަނެކެވެ." ޤާސިމް ވިދާޅުވިއެވެ.

ޤާސިމް ވަނީ ހުޅުމާލެ ދެކުނު ދާއިރާގެ ރައްޔިތުން ނަހުލާއަށް ވޯޓު ދެއްވުމަށް އެދިވަޑައިގެންފައެވެ. ޤާސިމް ވިދާޅުވީ ދާއިރާއާއި ދިވެހި ޤައުމުގެ އެންމެހާ ރައްޔިތުންނަށް އިޚްލާސްތެރި، ވަފާތެރި މެންބަރެއްކަމުގައި ނަހުލާ ވާނެކަމީ ޝައްކެއް އޮތް ކަމެއް ނޫން ކަމަށެވެ.

މަޖިލިސް އިންތިހާބު ބާއްވަން ނިންމާފައި ވަނީ މާޗް މަހުގެ 17 ގައެވެ. މިފަހަރުގެ އިންތިހާބުގައި 284،327 މީހަކަށް ވޯޓުލުމުގެ ހައްގު ލިބިގެންވެއެވެ. މަޖިލީހުގެ 20 ވަނަ ދައުރަށް 93 މެންބަރަކު އިންތިހާބު ކުރާނެއެވެ.