ޕާކިސްތާނުގެ ޤައުމީ އެއަރލައިން ކަމުގައިވާ ޕާކިސްތާން އިންޓަރނޭޝަނަލް އެއަރލައިންސް (ޕީ.އައި.އޭ) ވިއްކައިލަން ނިންމައިފިއެވެ.

މި ކަން އިޢުލާނު ކުރައްވަމުން އެ ޤައުމުގެ ޕްރައިވެޓައިޒޭޝަން ވުޒާރާގެ މިނިސްޓަރު ފަވާދް ޙަސަން ފަވާދް ވިދާޅުވީ ޕީ.އައި.އޭ ޕްރައިވެޓައިޒް ކުރުމާ ގުޅޭ މަސައްކަތްތަކުގެ 98 އިންސައްތަ ނިމިފައިވާ ކަމުގައެވެ. އަދި, އިންތިޚާބަށް ފަހު އެކުލަވައިލާ އައު ސަރުކާރުގެ ކެބިނެޓުން ރުހުން ދިނުމާއެކު ޕީ.އައި.އޭ ވިއްކައިލުމުގެ މަސައްކަތް ފުރިހަމަވާނެ ކަމުގައި އޭނާ ވިދާޅުވިއެވެ.

ޕީ.އައި.އޭއަކީ ފައިދާވާ ކުންފުންޏެއް ނޫނެވެ. އެ ކުންފުނި ވިއްކައިލަން ޕާކިސްތާނުުގެ ކުރީގެ ސަރުކާރުތަކުން ވަނީ ނުކުޅެދިފައެވެ. ނަމަވެސް, އެ ޤައުމުގެ އިޤުތިޞާދީ ހާލަތު އޮތް ގޮތުން, އެ ކަން މި ވަނީ މަޖުބޫރުވެފައެވެ. އެ ކުންފުނި ވިއްކައިލަން ޕާކިސްތާނުގެ ސަރުކާރުން ނިންމާފައި ވަނީ ބައިނަލްއަޤުވާމީ މާލީ ފަންޑު (އައި.އެމް.އެފާ) އެކު ހަދާފައިވާ 3 ބިލިޔަން އެމެރިކާ ޑޮލަރުގެ ބެއިލްއައުޓް އެއްބަސްވުމެއްގެ ދަށުންނެވެ. ޕާކިސްތާނުގައި މި ވަގުތު ވެރިކަން ކުރާ ވަގުތީ ސަރުކާރުން މި ކަމަށް އެއްބަސްވެފައި ވަނީ އައި.އެމް.އެފުން އެ ކަމަށް ބާރު އެޅުމުގެ ސަބަބުންނެވެ.

Advertisement

ޕާކިސްތާނުގެ އާންމު އިންތިޚާބުގެ ވޯޓުލުން ބޭއްވުމަށް ހަމަޖެހިފައި ވަނީ މި މަހުގެ 8 ވަނަ ދުވަހުއެވެ. އަދި, އިންތިޚާބަށް ފަހު, އިންތިޤާލީ މަރުޙަލާ ނިމުމުގެ ކުރިން ޕީ.އައި.އޭ ވިއްކައިލުމަށް ވަގުތީ ސަރުކާރުގެ ކެބިނެޓުން ރުހުން ދޭނެ ކަމުގައި ފަވާދް ވިދާޅުވިއެވެ. މި ކަމުގައި އެ ޤައުމަށް މާލީ ލަފާ ފޯރުކޮށްދެމުން ދަނީ އަރންސްޓް އެންޑް ޔަންގް ކުންފުނިންނެވެ.