އިޤުތިޞާދީ ގޮތުން ޤައުމު އޮތް ދަތި ހާލަތުން އަރައިގަތުމަށް ސަރުކާރުން ކުރަމުންދާ ކާމިޔާބު މަސައްކަތްތަކާއެކު، ކުރިއަށް އޮތީ ރާއްޖޭގެ އިޤްތިޞާދަށް އުޖާލާ ދުވަސްތަކެއްކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

މިއަހަރުގެ ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ ވިދާޅުވީ އިޤުތިޞާދީ ގޮތުން ތަދު އަހަރުތަކެއް ރައްޔިތުން ތަހައްމަލުކޮށްފިކަމަށާއި، އެ ޙާލަތުން ޤައުމު ސަލާމަތްކުރުމަށް ރެޔާއިދުވާލު ސަރުކާރުން ދަނީ މަސައްކަތްކުރަމުންކަމަށެވެ. އެގޮތުން ދައުލަތުގެ މާލިއްޔާއަށް ބުރަ އުފުލަން ނުޖެހޭ ގޮތަށް އައު މަޝްރޫޢުތައް ފެށޭތޯ މަސައްކަތް ކުރައްވަމުންދާކަމަށާއި ދައުލަތުގެ ކުންފުނިތަކަށް ފައިދާވާނެ ގޮތްތަކެއްވެސް ހޯދަމުންދާކަމަށެވެ. އަދި އިޤްތިޞާދީގޮތުން ކުރިއެރުންތައް ލިބޭނެ މަގުން މަސައްކަތް ކުރައްވަމުންދާކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.

"ދައުލަތުގެ ދަރަނި ކުޑަކޮށް، ލުއިކުރެވޭތޯ ބަލަމުން. އެއްވެސް ހަމަޔެއް ލަމަޔެއް ނެތި، ދައުލަތުގެ ޚަޒާނާއިން އެކި ފަރާތްތަކަށް ބަދަލުދޭން އުފައްދާފައި އޮތް ސެޓްލްމަންޓް ކޮމެޓީ މިހާރު ވާނީ އުވާލާފައި. ސޮވަރިންގ ފަންޑަށް އަލުން ޑޮލަރު ޖަމާކުރަން ވެސް ފަށައިފީމު. ބޭރު ފައިސާ ޤައުމުގައި ހިފެހެއްޓޭނެ އައު ގޮތްތައް ވެސް މިދަނީ ހޯދަމުން" ރައީސުލްޖުމްހޫރިއްޔާ ވިދާޅުވިއެވެ.

Advertisement

ރައީސުލްޖުމްހޫރިއްޔާ ވިދާޅުވީ އިޤްތިޞާދީގޮތުން ކުރިމަތިވެފައިވާ ދަތިކަމުން އަރައިގަންނަން ސަރުކާރުން ކުރައްވަމުން ގެންދަވާ މަސައްކަތްތަކާއެކު މުސްތަޤުބަލު ފެންނަނީ ވަރަށްވެސް އުޖާލާކޮށްކަމަށެވެ. އެގޮތުން މިއަހަރު ފުރަތަމަ ފަހަރަށް ދިވެހިރާއްޖެއަށް 2 މިލިއަން ފަތުރުވެރިން ޒިޔާރަތްކުރާނެކަމަށް އަންދާޒާކުރެވޭކަމަށާއި އަދި ވެލާނާ އިންޓަނޭޝަނަލް އެއަރޕޯޓު ތަރައްޤީކުރުމުގެ މަޝްރޫޢު ނިމުމުން މެދުރާސްތާގައި މިއަދަދު އަހަރަކު އެވަރެޖްކޮށް 10.3 އިންސައްތައިން ދާނީ ކުރިއަރަމުންކަމަށްވެސް ރައީސް ވިދާޅުވިއެވެ.

"މުޅި އިޤުތިޞާދު ސިންދަފާތުކުރުމުގެ މަސައްކަތުގެ މުހިންމު އެއް ބައެއްގެ ގޮތުގައި އަޅުގަނޑުމެން ދެކެނީ ރާއްޖެއަށް އެ ދާއިރާއަކުން އެންމެ ބޮޑު ކޮމްޕެރަޓިވް އެޑްވާންޓޭޖެއް ލިބިފައި މި އޮތް ފަތުރުވެރިކަމުގެ ދާއިރާ ވެސް ސިންދަފާތުކުރުން. މިކަން ހާސިލްކުރުމަށް، އައު މާކެޓުތަކާއި ރާއްޖެއާ ދަތުރުފަތުރުގެ ގޮތުން ސީދާ ގުޅުވައިލައި، ލޯންގް ހޯލް ރޫޓްތައް އިތުރުކުރުމަށް މިދަނީ މަސައްކަތް ކުރަމުން" ރައީސުލްޖުމްހޫރިއްޔާ ވިދާޅުވިއެވެ.

ފަތުރުވެރިކަމުގެ ދާއިރާގެ އައު ޕްރޮޑަކްޓްތައް ތަޢާރަފުކުރުމުގެ މަސައްކަތާއެކު ފަތުރުވެރިކަމުގެ ދާއިރާއަށް ލިބޭނެކަމަށް ލަފާކުރާ ކުރިއެރުމުގެ އިތުރުން، އިމާރާތްކުރުމާއި، ރިއަލް އެސްޓޭޓް އަދި ދަތުރުފަތުރު ފަދަ ދާއިރާތައްވެސް ދާނީ ބާރަށް ކުރިއަރަމުންކަން ރައީސުލްޖުމްހޫރިއްޔާ ވިދާޅުވިއެވެ. މިކަންކަމަށް ރިޢާޔަތްކުރުމާއެކު މި އަހަރު ރާއްޖޭގެ އުފެއްދުންތެރިކަން 5.5 އިންސައްތައިން ކުރިއަރާނެކަމަށް ރައީސުލްޖުމްހޫރިއްޔާ އަންދާޒާކުރެއްވިއެވެ. އަދި މެދުރާސްތާގައި އަހަރަކު އެވަރެޖްކޮށް 7.1 އިންސައްތައިން އުފެއްދުންތެރިކަން ކުރިއަރާނެކަމަށްވެސް ރައީސުލްޖުމްހޫރިއްޔާ ލަފާކުރެއްވިއެވެ.