ރައްޔިތުންގެ މަޖިލީހުގެ މުވައްޒަފުންނަށް ހައުސިންގ ސްކީމެއް އެކުލަވާލަން ނިންމާފައިވާ ކަމަށް މަޖިލީހުގެ ރައީސް މުހައްމަދު އަސްލަމް ވިދާޅުވެއްޖެއެވެ.

އަސްލަމް މިހެން ވިދާޅުވީ މަޖިލީހުގެ މުވައްޒަފުންގެ ހިދުމަތުގެ އަގުވަޒަން ކުރުމަށް ބޭއްވި ހަފުލާއެއްގައި  ވާހަކަދައްކަވަމުންނެވެ.

މި ހަފުލާގައި އަސްލަމް ވިދާޅުވީ މުސާރަ ބޮޑުނުވެ، ގިނަ ދުވަސްވުމާއި ދައުލަތުގެ އެކި ދާއިރާތަކަށް ހާއްސަކޮށްގެން ހައުސިންގ ސްކީމުތައް ހިންގި ނަމަވެސް، މަޖިލީހުގެ މުވައްޒަފުންނަށް އެފަދަ ސްކީމެއް ނެތް ކަމަށެވެ.

Advertisement

އެހެންވެ މަޖިލީހުގެ މުވައްޒަފުންގެ މުސާރަ 20 ޕަސެންޓް ބޮޑުކޮށްފައިވާ ކަމަށާއި ދެން އޮތީ މުވައްޒަފުންނަށް ހާއްސަ ހައުސިންގ ސްކީމެއްގެ ޕްލޭނެއް އެކުލަވާލުން ކަމަށް ވެސް އަސްލަމް ވިދާޅުވިއެވެ.

އަސްލަމް ވިދާޅުވީ އެ މަސައްކަތް ކުރިއަށް ގެންދާނީ މަޖިލީހުންގެ މުވައްޒަފުންނާއި އަމީންއާންމުގެ މަޝްވަރާގެ މަތިން ކަމަށެވެ. އަދި މަޖިލީހުގެ އިދާރީ މުވައްޒަފުން ކުރާ މަސައްކަތް އެހާ ބޮޑަށް އާންމުންނަށް ފާހަގަ ނުކުރެވި އޮތް ނަމަވެސް ފަރުދާގެ ފުރަގަހުގައި މުވައްޒަފުން ކުރާ މަސައްކަތަކީ ގައުމު ފަހުރުވެރިވާ ފަދަ މަސައްކަތްތަކެއް ކަމަށެވެ.