2022 ވަނަ އަހަރުގެ ފެބްރުއަރީ މަހުގެ 24 ވަނަ ދުވަހު ރަޝިޔާއިން ޔޫކްރޭނަށް އަރައިގަތް ފަހުން 500 ދުވަސް ހޭދަވިއިރު، 9،000 އަށް ވުރެ ގިނަ އާންމުން މަރުވެފައިވާ ކަމަށް އދ އިން ބުނެފި އެވެ.

ޔޫކްރޭންގަ ހުންނަ އދ.ގެ ހިއުމަން ރައިޓްސް މޮނިޓަރިން މިޝަން (އެޗްއާރުއެމްއެމްޔޫ) އިން ހުކުރު ދުވަހު ނެރުނު ބަޔާނެއްގައި ބުނެފައި ވަނީ މިހާތަނަށް 9،000 އާންމުން މަރުވެފައިވާކަން ކަށަވަރު ކުރެވުނު ކަމަށެވެ. އެ މިޝަނުން ބުނެފައިވަނީ ރަސްމީކޮށް މަރުވި މީހުންގެ އަދަދަށް ވުރެ ހަގީގީ އަދަދު މާ ގިނަވުން އެކަށީގެންވާ ކަމަށެވެ.

"މިއަދު އަޅުގަނޑުމެން ފާހަގަކުރަނީ ޔޫކްރޭންގެ އާންމުންނަށް ބިރުވެރި ގެއްލުންތަކެއް ލިބެމުންދާ ހަނގުރާމައިގެ މައިލްސްޓޯނެއް،" އެޗްއާރުއެމްއެމްޔޫގެ ޑެޕިއުޓީ ހެޑް ނޯއެލް ކަލްހޫން ނެރުނު ބަޔާނުގައި ވިދާޅުވި އެވެ.

Advertisement

މިއަހަރު ޔޫކްރޭންގައި 2022 ވަނަ އަހަރަށް ވުރެ އެވްރެޖްކޮށް ގެއްލުން ލިބުނު މީހުންގެ އަދަދު މަދުވި ނަމަވެސް، އެ އަދަދު އަނެއްކާވެސް މައްޗަށް އަރަން ފެށީ މެއި އަދި ޖޫން މަހު ކަމަށް މޮނިޓަރުން ފާހަގަކުރި އެވެ.

ޖޫން މަހުގެ 27 ވަނަ ދުވަހު ޔޫކްރޭންގެ އިރުމަތީ ސަރަހައްދުގެ ކްރަމަޓޯސްކަށް ދިން މިސައިލް ހަމަލާއެއްގައި ހަތަރު ކުޑަކުދިން ހިމެނޭ ގޮތަށް 13 އާންމުން ވަނީ މަރުވެފައެވެ.

އަދި ޔޫކްރޭންގެ ހުޅަނގު ސިޓީއެއް ކަމަށްވާ ލްވިވްގައި ފްރަންޓް ލައިނާ ދުރަށް ބުރާސްފަތި ދުވަހުގެ ހެނދުނުގެ ވަގުތެއްގައި ދިން މިސައިލް ހަމަލާއެއްގައި 10 މީހުން މަރުވެ އިތުރު 37 މީހަކު ވަނީ ޒަޚަމްވެފައެވެ.

އދ އިން ބުނީ މިހަމަލާއަކީ ދުނިޔޭގެ ތަރިކަ މުއާހަދާގެ ދަށުން ހިމާޔަތްކޮށްފައިވާ ސަރަހައްދަކަށް ދިން ފުރަތަމަ ހަމަލާ ކަމަށާއި ތާރީހީ އިމާރާތަކަށް ގެއްލުން ލިބިފައިވާ ކަމަށެވެ.