ނައިކް ކުންފުނިން ބުރާސްފަތި ދުވަހު ބުނީ މިއަހަރު ފައިދާ ދަށްވުމަށް ފަހު ހަރަދު ކުޑަކުރަން އުޅޭތީ ޖުމްލަ ވޯކްފޯސްގެ ގާތްގަނޑަކަށް %2 ނުވަތަ 1،600 އަށް ވުރެ ގިނަ ވަޒީފާ ކުޑަކުރާނެ ކަމަށެވެ.

ނައިކްގެ ވާދަވެރިންގެ ތެރެއިން އެޑިޑާސް، ޕޫމާ އިން ވެސް ވަނީ މި އަހަރު އާމްދަނީ ދަށްވާނެ ކަމުގެ އިންޒާރު ދީފަ އެވެ.

ޑިސެމްބަރު މަހު ނައިކީން ވަނީ ބައެއް އުފެއްދުންތަކުގެ ސަޕްލައި ހަރުކަށިކުރުމާއި، ސަޕްލައި ޗޭން ރަނގަޅުކުރުން ފަދަ ފިޔަވަޅުތަކުގެ ތެރެއިން ކުރިއަށް އޮތް ތިން އަހަރު ދުވަހުގެ ތެރޭގައި ދެ ބިލިއަން ޑޮލަރުގެ ސޭވިންގްސް ޕްލޭނެއް ކަނޑައަޅާފައެވެ.

Advertisement

އަދި ތިން ވަނަ ކުއާޓަރުގައި މުވައްޒަފުން ވަކިކުރުމުގެ ހަރަދުގެ ގޮތުގައި ގާތްގަނޑަކަށް 400 މިލިއަން ޑޮލަރާއި 450 މިލިއަން ޑޮލަރާ ދެމެދުގެ އަދަދެއް ކުރާނެ ކަމަށް ވެސް އެކުންފުނިން ވަނީ އިއުލާންކޮށްފަ އެވެ.

ނައިކްގައި 2023 ވަނަ އަހަރުގެ މެއި މަހުގެ 31 ވަނަ ދުވަހުގެ ނިޔަލަށް ގާތްގަނޑަކަށް 83،700 މުވައްޒަފުން ތިބި ކަމަށް އެ ކުންފުނީގެ ހިސާބުތަކުގައި ވެއެވެ.

ވަޒީފާއިން ވަކިކުރުމުގެ ސަބަބުން ފިހާރަތަކާއި ޑިސްޓްރިބިއުޝަން ސެންޓަރުތަކުގައި މަސައްކަތްކުރާ މުވައްޒަފުންނަށް ނުވަތަ އެ ކުންފުނީގެ އިނޮވޭޝަން ޓީމުގައި ހިމެނޭ މުވައްޒަފުންނަށް އަސަރުކުރާނެ ކަމަށް ބެލެވޭ ކަމަށް ރިޕޯޓުތަކުގައި ވެއެވެ.