ހައްދުފަހަނަ އަޅާފައިވާ ޔަހޫދީންނާއި ދެކޮޅަށް އިތުރު ފިޔަވަޅުތައް އެޅުމަށް އިންޓަނޭޝަނަލް ކޯޓު އޮފް ޖަސްޓިސް އައިސީޖޭއަށް ހުށަހަޅާފައިވާ ހުށައެޅުމަށް ދިވެހިރާއްޖެއިން ތާޢީދުކުރަން ނިންމުމާއި ގުޅިގެން ފަލަސްތީނުން އެކަމަށް މަރުހަބާ ކިޔައި، ޝުކުރު އަދާކޮށްފިއެވެ.

ހައްދުފަހަނަ އަޅާފައިވާ ޔަހޫދީން ފަލަސްޠީނަށް ދެމުންދާ ޙަމަލާތަކާއި ގުޅިގެން ޔަހޫދީންނާއި ދެކޮޅަށް އިތުރު ފިޔަވަޅުތައް އިންޓަނޭޝަނަލް ކޯޓު އޮފް ޖަސްޓިސް އައިސީޖޭއަށް ހުށަހަޅާފައިވަނީ ދެކުނު އެފްރިކާއިންނެވެ.

ރައީސުލްޖުމްހޫރިއްޔާ ޑރ. މުޙައްމަދު ދެކުނު އެފްރިކާއިން އައިސީޖޭއަށް ހުށަހެޅި މައްސަލައަށް ފުރިހަމައަށް ތާއީދުކުރާކަން ހާމަކުރައްވާފައެވެ.

ރައީސުލްޖުމްހޫރިއްޔާގެ ނިންމެވުމާއި ގުޅިގެން ފަލަސްތީނުން ވަނީ އެކަން ފާހަގަކޮށް ޝުކުރު ދަންނަވާފައެވެ. ފަލަސްތީނުގެ ސަރުކާރުން ކުރި ޓްވީޓެއްގައި ވަނީ ބައިނަލްއަޤްވާމީ އެކި މައިދާންތަކުގައި ފަލަސްތީނުގެ ރައްޔިތުންގެ ހައްގުގައި ރާއްޖެއިން ކުރަމުންދާ މަސައްކަތަށް ޝުކުރު އަދާކުރުމަށް ބުނެފައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ ފަލަސްތީނަށް ވެރިވެގަނެގެން އުޅޭ ޔަހޫދީން ރަފަޙްގައި ލާ އިންސާނީ އަމަލުތައް ހިންގަމުންދާއިރު ބައިނަލްއަޤްވާމީ މުޖްތަމަޢު މަޑު އޮވެގެން ނުވާނެ ކަމަށާއި، އެކަމާއި ދެކޮޅަށް ތެދުވަންޖެހޭކަމަށެވެ. އަދި ޔަހޫދީންނާއި ދެކޮޅަށް އިތުރު ފިޔަވަޅުތައް އެޅުމަށް ދެކުނު އެފްރިކާއިން އިންޓަނޭޝަނަލް ކޯޓު އޮފް ޖަސްޓިސް އައިސީޖޭއަށް ހުށަހަޅާފައިވާ ހުށަހެޅުމަށް ދިވެހިރާއްޖެއިން ފުރިހަމައަށް ތާއީދުކުރާކަމަށް ވިދާޅުވިއެވެ.

އެމަނިކުފާނު ވިދާޅުވީ ފަލަސްތީނުގެ ރައްޔިތުންނާއި ދެކޮޅަށް ހައްދު ފަހަނަ އަޅާފައިވާ ޔަހޫދީން ހިންގާ ލާއިންސާނީ ޖަރީމާތައް ހުއްޓާލައި، ބައިނަލްއަޤްވާމީ ޤާނޫނުތަކަށް ތަބާވާންޖެހޭކަމަށެވެ. އެކަމާއި ދެކޮޅަށް އިންޓަނޭޝަނަލް ކޯޓު އޮފް ޖަސްޓިސްއިން މިހާރުން މިހާރަށް ފިޔަވަޅު އަޅަންޖެހޭކަމަށްވެސް ރައީސް ވިދާޅުވިއެވެ.

ރާއްޖޭގެ ރައްޔިތުން އަބަދުވެސް ތިބޭނީ ފަލަސްތީނުގެ ރައްޔިތުންނާއެކުގައި ކަމަށާއި 1967ގެ ކުރިން ބޯޑަރު އޮތް ގޮތަށް އިރުމަތީ ޤުދުސް ވެރިރަށުގެ ގޮތުގައި ފަލަސްތީން މިނިވަން ދައުލަތެއްގެ ގޮތުގައި ކަނޑައެޅުމަށް ގޮވާލާގޮވާލުން ރައީސް ވަނީ ތަކުރާރުކުރައްވާފައެވެ. އަދި ފަލަސްތީނަކީ މިނިވަން ދައުލަތެއްގެ ގޮތުގައި ކަނޑައެޅި، އެ ޤައުމުގެ މުސްލިމް އަޚުންނާއި އުޚްތުން އަމާންކަމާއި މިނިވަންކަމާއެކު ދިރިއުޅޭ ދުވަހެއް އަންނަންދެން އެ ޤައުމުގެ ރައްޔިތުންގެ ޙައްޤުގައި އަޑު އުފުލުމުގައި ދިވެހިން ދެމި ތިބޭނެކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.

މިދިޔަ އަހަރުގެ އޮކްޓޯބަރު މަހުން ފެށިގެން ޔަހޫދީން ފަލަސްތީނަށް ދެމުންދާ ހަމަލާތަކުގައި އެތައް މިލިއަން މީހުން ހާލުގައި ޖެހި، ރަފަހަށް ވަނީ ބަދަލުވެފައެވެ. ނަމަވެސް ޔަހޫދީން ވަނީ ރަފަޙްގެ އިރުމައްޗާއި މެދުތެރޭގައި ދިރިއުޅެމުން އަންނަ ރައްޔިތުން އެ ސަރަހައްދުތަކުން ފައިބަން މިހާރު އަންގާފައެވެ. މި ވަގުތު ރަފަޙްގައި ފަލަސްތީނުގެ 1.4 މިލިއަނެއްހާ މީހުން އެބަތިއްބެވެ.

ޔަހޫދީން ދެމުން އަންނަ ހަމަލާތަކުގައި މިހާތަނަށް ފަލަސްތީނުގެ 35،000 އަށްވުރެ ގިނަ މީހުން ވަނީ ޝަހީދުކޮށްލާފައެވެ.