ސަރުކާރުގެ ގެދޮރުވެރިން ޕްރޮގްރާމުގެ ދަށުން ފްލެޓް ލިބުނު ފަރާތްތަކުގެ ލިސްޓު މި މަސް ނިމުމުގެ ކުރިން އިއުލާނު ކުރަން މަސައްކަތް ކުރަމުން އަންނަ ކަމަށް ފެލްޓް ކޮމިޓީގެ ޗެއާމަން، ޕްލޭނިން މިނިސްޓްރީގެ ސްޓޭޓް މިނިސްޓަރު އަކުރަމް ކަމާލުއްދީން މިއަދު ވިދާޅުވެއްޖެ އެވެ.

ފްލެޓާއި ގޯތި ކޮމިޓީން ކުރިން މަސައްކަތް ކުރަމުން އައީ މިދިޔަ މަހުގެ ތެރޭގައި ލިސްޓް ނެރެވޭތޯ އެވެ. އެކަމަކު އީދު ބަންދުގެ ކުރިން ނެރުނީ ގޯތި ލިސްޓެވެ. ބޯހިޔާވަހިކަމުގެ ވައުދާ ގުޅުވައި ފްލެޓް ލިސްޓު ލަސްވާ މައްސަލާގައި ސިޔާސީ ފަރާތްތައް ހިމެނޭހެން ދަނީ ސުވާލު އުފައްދައި ސަރުކާރަށް ފާޑުކިއުން އަމާޒުކުރަމުންނެވެ.

ފްލެޓް ލިސްޓާ ގުޅޭ ގޮތުން އަކްރަމް ކުރެއްވި ޓުވީޓެއްގައި ވިދާޅުވީ، ފްލެޓް ލިސްޓު މި މަސް ނިމުމުގެ ކުރިން ނެރެން މަސައްކަތް ކުރަމުން އަންނަ ކަމަށެވެ. ކުރިން ވެސް ދަންނަވާފައިވާނީ އެގޮތަށް ކަމަށް ވިދާޅުވި އެވެ.

Advertisement

މި ސަރުކާރުގެ ގެދޮރުވެރިޔާ ސްކީމުގެ ދަށުން ފްލެޓަށް ކުރިމަތިލީ 20،600 މީހުންނެވެ. ފްލެޓަށް ކުރިމަތިލީ މީހުންގެ ތެރެއިން 14،400 މީހުން ކުރިމަތިލީ ތިން ކޮޓަރީގެ އެޕާޓްމެންޓަށެވެ. އަދި 6،200 މީހުން ކުރިމަތިލީ ދެ ކޮޓަރީގެ އެޕާޓްމެންޓަށެވެ.