މިދިޔަ މަހު ބޭއްވި ރައްޔިތުންގެ މަޖިލިސް އިންތިހާބުގައި ވާދަކުރި ކެންޑިޑޭޓުން މާލީ ބަޔާން ހުށަހަޅަން ދިން މުއްދަތު ހަމަވި އިރު، 48 ކެންޑިޑޭޓަކު ބަޔާން ހުށަނާޅާ ކަމަށް އިލެކްޝަން ކޮމިޝަން (އީސީ) އިން ބުނެފި އެވެ.

މާލީ ބަޔާން ހުށަހަޅަން ދިން މުއްދަތު ހަމަވީ މިދިޔަ ބުދަ ދުވަހުގެ ރޭ ދެންވަރު 12:00 އަށެވެ. މިދިޔަ މަހުގެ 21 ގައި ބޭއްވި 20 ވަނަ މަޖިލިސް އިންތިހާބުގައި ޖުމްލަ 368 ކެންޑިޑޭޓަކު ވާދަކުރި އެވެ. މާލީ ބަޔާން ހުށަހަޅަން ދިން މުހުލަތުގެ ތެރޭގައި ބަޔާން ހުށަހެޅީ 320 ކެންޑިޑޭޓުންނެވެ.

އިންތިހާބުތަކުގައި ވާދަކުރާ ކެންޑިޑޭޓުން މާލީ ބަަޔާން ހުށަހެޅުމަކީ ގާނޫނުން ލާޒިމުކުރާ ކަމެކެވެ. އަދި މާލީ ބަޔާން ހުށަނާޅާ ނަމަ ނުވަތަ ހުށަހަޅާ ބަޔާންތަކުގައި ދޮގު މައުލޫމާތެއް ހިމެނޭ ނަމަ ދައުވާ ވެސް ކުރެވޭނެ އެވެ. އެ ކުށުގެ އަދަބަކީ އަހަރު ދުވަހަށް ޖަލަށް ލުން ނުވަތަ 72،000ރ. އިން ޖޫރިމަނާކުރުމެވެ.

Advertisement

އީސީން ބުނެފައި ވަނީ މާލީ ބަޔާން ހުށަނާޅާ ކެންޑިޑޭޓުންނަށް ފިޔަވަޅު އަޅާނެ ކަމަށެވެ.

ޖުމްލަ 93 މެންބަރުން ހިމެނޭ އާ މަޖިލިސް އަންނަ އަންގާރަ ދުވަހު ހުވާކުރާނެ އެވެ. އެ މަޖިލީހުގެ ސުޕަ މެޖޯރިޓީ ވެރިކަން ކުރާ ޕީއެންސީން ވަނީ ހޯދައިފަ އެވެ.