ތަރައްގީ ކުރަމުން އަންނަ މ. މުލީ އެއާޕޯޓަށް މުވައްޒަފުން ނަގަން ތައްޔާރުވާން ފަށައިފި އެވެ.

ރީޖަނަލް އެއާޕޯޓްސް ކޮމްޕެނީ ލިމިޓެޑް (އާރްއޭސީއެލް) ގެ މެނޭޖިން ޑިރެކްޓަރު އަހުމަދު މުބީން ދައުލަތުގެ މީޑިއާ ޕީއެސްއެމްގައި ވިދާޅުވީ އެއާޕޯޓަށް ބޭނުންވާ މުވައްޒަފުން ނަގައި މުވައްޒަފުންނަށް ބޭނުންވާ ތަމްރީނުތައް ވެސް ދޭނެ ކަމަށެވެ. އެހެންވެ އެކަމުގެ ތައްޔާރީތައް ކުރިއަށްދާ ކަމަށް ވިދާޅުވި އެވެ.

"އެއާޕޯޓް މުވައްޒަފުންނަށް ދޭން ޖެހޭ ޚާއްސަ ޓްރެއިނިންތައް އެބަހުރި. މިހާރު މުވައްޒަފުން ނެގުމަށް އިޢުލާން ކުރުމަށް އަންނަނީ ތައްޔާރުވަމުން،" މުބީން ވިދާޅުވި އެވެ. "ހުޅުވުމުގެ ތިން ހަތަރު މަސް ކުރިން ޓްރެނިންތައް ދޭން ފަށަން ޖެހޭ. އެހެން ނޫނީ އެހެން އެއާޕޯޓްތަކުން މުވައްޒަފުން ގެންނަން ޖެހޭނީ."

Advertisement

މުލީ އެއާޕޯޓު މަޝްރޫރު ކުރިއަށް ގެންދަނީ އެމްޓީސީސީއާ ހަވާލުކޮށްގެންނެވެ.

މުލީ އެެއާޕޯޓުގެ މަސައްކަތް އެމްޓީސީސީއާ ހަވާލުކުރީ 221 މިލިއަން ރުފިޔާ އަށް ފެބްރުއަރީ 28، 2021 ގަ އެވެ. މަސައްކަތް ހަވާލުކުރީ އަހަރުގެ ތެރޭގައި ނިންމާ ގޮތަށެވެ. މި މަޝްރޫއުގެ ދަށުން، 14 ހެކްޓަރުގެ ބިން ހިއްކުމާއި، 1،812 މީޓަރުގެ ސަރަޙައްދެއްގެ ގޮނޑުދޮށް ހިމާޔަތް ކުރުމާއި، 1،200 މީޓަރު ދިގު 30 މީޓަރު ފުޅާ ރަންވޭއެއް ޤާއިމުކުރުމާއި، ޓެކްސީވޭއަކާއި އޭޕްރަންއެއް ހެދުމުގެ މަސައްކަތް ހިމެނެއެވެ.