ފުވައްމުލަކު ސިޓީ ކައުންސިލުން މިއަދު ބުނީ އެ ސިޓީގެ ބޮޑެތި މަގުތަކުގައި ހަވީރު 4:00 ގައި ފަށަން އޮތް މާލި ޕެރޭޑް ކެންސަލްކުރީ އެކަށީގެންވާ ވަރަށް ތަރުހީބު ނުލިބުމުން ކަމަށެވެ.

އީދާ ގުޅުވައިގެން ރާއްޖޭގެ އެކި ހިސާބުތަކުގައި މާލި ޕެރޭޑް ބާއްވަ އެވެ. އެގޮތުން އެންމެ ފޯރިގަދަކޮށް އަދި އާންމުންގެ ސަމާލުކަން އެންމެ ބޮޑަށް ލިބޭ ގޮތަށް މާލި ޕެރޭޑް ބާއްވަމުން އަންނަ ކަމަށް ގިނަ ބަޔަކު ފާހަގަކުރަނީ ކުޅުދުއްފުއްޓެވެ. މި ބޮޑު އީދުގައި ވެސް އެ ސިޓީގައި ވަރުގަދަ މާލި ޕެރޭޑެއް ބޭއްވި އެވެ.

ކުޅުދުއްފުށީގައި ބާއްވާ މާލި ޕެރޭޑްގެ ހާއްސަ ކަމަކީ އަބަދު ވެސް ސަރުކާރުގެ ވައުދުތައް ހަނދާންކޮށް ދިނުމާއި ސިޔާސީ ބޭފުޅުން ދައްކަވާ ވާހަކަތަކާއި އުޅުއްވާ ގޮތް މާލި ޕެރޭޑްގެ ތެރެއިން ގެނެސްދިނުމެވެ. މިކަމާ ހެދި މީގެ ކުރިން ބައެއް ފަހަރު ސަރުކާރާއި ސިޔާސީ މީހުންގެ ނުރުހުން ވެސް މާލި ޕެރޭޑަށް އަމާޒުވެފައިވެ އެވެ.

Advertisement

ތަފާތު ސިފަސިފަ އަށް ބަދަލުވެގެން މާލި ޕެރޭޑް ފަދަ ހަރަކާތްތައް ބާއްވާތީ މިހާރުގެ އިސްލާމިކް މިނިސްޓަރު ޑރ. މުހައްމަދު ޝަހީމު އަލީ ސައީދު އެކަމާ ޖަންބޮޑުވުން ފާޅު ކުރައްވާފައިވެ އެވެ. އޭނަ ސޯޝަލް މީޑިއާ ޕޯސްޓެއްގައި ވިދާޅުވެފައި ވަނީ ޖިންނި ޝައިޠާނުންގެ ސިފަ ޖައްސައިގެން ތިބެ މާތްވެގެންވާ އިސްލާމީ ޢީދު ފާހަގަ ކުރުން ޝަރުޢީ ގޮތުން ހުއްދައެއް ނުވާނެ ކަމަށެވެ. އަދި އިސްލާމީ ޢީދުތައް ފާހަގަކުރަން ވާނީ އިސްލާމީ ސަޤާފަތާ އެއްގޮތަށް ކަމަށް މިނިސްޓަރު ވިދާޅުވި އެވެ.

"ދިވެހިންގެ ސަޤާފަތެއް ކަމުގައި ބެލެވޭނީ އިސްލާމީ އުޞޫލުތަކާ އެއްގޮތް ކަންކަން. އެ ނޫންކަން ކަމަކީ ޚުރާފީ ބާޠިލްކަންކަން. ކުޅިވަރުކުޅުމާއި އުފާ ފާޅުކުރުމަކީ ޢީދުގައި އޮންނަން ޖެހޭނެ ކަމެއް،' ޝަހީމު ވިދާޅުވި އެވެ. "މި ކަންކަން އޮންނަން ވާނީ އިސްލާމީ ހިދާޔަތުގެ ތެރޭގަ. އިސްލާމީ ހިދާޔަތުގެ ތެރޭގައި ދެމި ތިބުމަށް ހެޔޮ ދުޢާކޮށް އެކަމުގައި ސާބިތުވާން ޖެހޭނެ."