ނިމިދިޔަ އެމްޑީޕީގެ ސަރުކާރުން ހުކުމް ތަންފީޒުކުރަމުންދިޔަ 400 އަށްވުރެ ގިނަ ކުށްވެރިން މިދިޔަ އަހަރު ދޫކޮށްލާފައިވާކަމަށް ތަފާސް ހިސާބުތަކުން ދައްކައިފިއެވެ.

ކުށްވެރިންނާއި ގުޅޭ ތަފާސް ހިސާބުތައް ބަލަހައްޓާ ދާޚިލީ ސަލާމަތާއި ފަންނިއްޔާތާބެހޭ ވުޒާރާއިން ފޯރުކޮށްދީފައިވާ މައުލޫމާތުތައް ދައްކާގޮތުން މިދިޔަ އަހަރުގެ ޖެނުއަރީމަހުގެ 1 ވަނަ ދުވަހުން ފެށިގެން މިދިޔަ އަހަރުގެ ނޮވެމްބަރުމަހުގެ 16 ވަނަ ދުވަހާއި ހަމައަށް 434 ކުށްވެރިޔަކު ދޫކޮށްލާފައިވެއެވެ.

ދާޚިލީ ސަލާމަތާއި ފަންނިއްޔާތާބެހޭ ވުޒާރާއިން ހިއްސާކޮށްފައިވާ ތަފާސް ހިސާބުތަކުން ދައްކާގޮތުގައި ހުކުމަށް ނުވަތަ ބަންދަށް ލުއި ދިނުމަށްފަހު ދޫކޮށްލާފައިވާ މީހުންގެ ތެރޭގައި ކްލެމެންސީއާ އަފްއާމުގެ ދަށުން ދޫކޮށްލާފައިވާ މީހުންނާއި ޕެރޯލްގެ ދަށުން ދޫކޮށްލާފައިވާ މީހުންނާއި ގޭބަންދަށް ބަދަލުކޮށްފައިވާ މީހުން ހިމެނެއެވެ.

Advertisement

ތަފާސް ހިސާބުތަކުން ދައްކާގޮތުން މިދިޔަ އަހަރުގެ ނޮވެމްބަރުމަހުގެ 16 ވަނަ ދުވަހާއި ހަމައަށް ކްލެމެންސީއާއި އަފުއާމުގެ ދަށުން 290 މީހަކު ވަނީ ދޫކޮށްލާފައެވެ. މީގެ ތެރޭގައި އެންމެ ގިނައީ މަސްތުވާތަކެތީގެ މައްސަލަތަކުގައި ބަންދުކޮށްފައި ތިބި މީހުންނެވެ. އެގޮތުން، މަސްތުވާތަކެތީގެ މައްސަލަތަކުގައި ޖަލުގައިއ ބަންދުކޮށްފައި ތިބި 249 މީހަކަށް މައާފުދީ ދޫކޮށްލާފައިވާކަމަށް ދާޚީލީ ސަލާމަތާބެހޭ ވުޒާރާގެ ހިސާބުތަކުން ދައްކައެވެ.ކްލެމެންސީއާއި އަފުއާމުގެ ދަށުން ދޫކޮށްލި މީހުންގެ ތެރޭގައި މާރާމާރީ އާއި ބިރުދެއްކުމާއި ގަސްތުގައި މީހުން މަރާލުމާއި ޓެރަރިޒަމް ފަދަ ނުރައްކާތެރި ކުށްތަކުގައި ބަންދުކޮށްފައި ތިބި 16 މީހަކުވެސް ހިމެނެއެވެ. އަދި ފައިސާއާ ގުޅޭ އެކި ކުށްތަކުގައި ބަންދުކޮށްފައި ތިބި 21 މީހަކަށް މައާފު ދީފައިވާއިރު ޖިންސީ ކުށްތަކުގައި ބަންދުކޮށްފައި ތިބި 3 މީހަކަށްވެސް ވަނީ މައާފު ދީފައެވެ.

ދާޚިލީ ސަލާމަތާބެހޭ ވުޒާރާގެ ތަފާސް ހިސާބުތައް ދައްކާގޮތުން ޕެރޯލްގެ ދަށުން މިދިޔަ އަހަރުގެ ނޮވެމްބަރު މަހުގެ 16 ވަނަ ދުވަހާ ހަމައަށް 53 މީހުން ވަނީ ދޫކޮށްލާފައެވެ. މީގެ ތެރޭގައި ޖިންސީ ކުށްތަކުގައި ބަންދުގައި ތިބި 2 މީހަކާއި މަސްތުވާތަކެތީގެ މައްސަލަތަކުގައި ބަންދުގައި ތިބި 46 މީހުން އަދި ތޫނު އެއްޗަކުން ހަމަލާދިނުމާއި ޓެރަރިޒަމްގެ މައްސަލަތަކުގައި ބަންދުގައި ތިބި 3 މީހުންނާއި މާލީ އެކި ކުށްތަކުގައި ވައްކަމުގެ މައްސަލަތަކެއްގައި ބަންދުގައި ތބި ދެ މީހަކު ހިމެނެއެވެ.

ބަންދުގައި ތިއްބާ 91 މީހަކު ގޭބަންދަށް ބަދަލުކުރި ކަމަށްވެސް ދާޚިލީ ސަލާމަތާބެހޭ ވުޒާރާއިން މައޫލޫމާތު ދެއްވައެވެ. މީގެ ތެރޭގައިވެސް ގިނައީ މަސްތުވާތަކެތީގެ މައްސަލަތަކުގައި ބަންދުގައި ތިބި މީހުންނެވެ. އެގޮތުން، މަސްތުވާތަކެތީގެ މައްސަލަތަކުގައި ބަންދުގައި ތިބި 36 މީހަކު ގޭބަންދަށް ބަދަލުކޮށްފައިވާއިރު ޖިންސީ ކުށްތަކުގައި ބަންދުގައި ތިބި 22 މީހަކާއި ނުރައްކާތެރި ކުށްތަކުގައި ބަންދުގައި ތިބި 7 މީހަކާއި ފައިސާއާ ގުޅޭ އެކި ކުށްތަކުގައި ބަންދުގައި ތިބި 19 މީހަކު އަދި ފޯޖަރީ އާއި ޖަލުން ފިލުމާއި މަދަނީ ނުވަތަ އާއިލީ މައްސަލަތަކުގެ ހުކުމަށް އަމަލުނުކުރުމާއި ހުއްދަ ނޫންތަންތަނަށް ވަނުމުގެ ކުށުގައި ބަންދުގައި ތިބި 7 މީހަކުވެސް ވަނީ ގޭބަންދަށް ބަދަލުކޮށްފައެވެ.

މިދިޔަ އަހަރު ގިނަ އަދަދެއްގެ ކުށްވެރިންތަކެއް ދޫކޮށްލާފައިވާއިރު، އެކަމާއި ގުޅިގެން މާލެ ސަރަހައްދުގައި ކުށްކުރުން ގިނަވެފައިވާކަމަށް މޯލްޑިވްސް ޕޮލިސް ސަރވިސްއިންވެސް ވަނީ ހާމަކޮށްފައެވެ. އެގޮތުން ކުށްވެރިން ދޫކޮށްލާފައިވަނީ އެ މީހުންގެ ކަންކަން ބެލެހެއްޓޭނެ ހަރުދަނާ ނިޒާމެއް ނެތިކަމަށެވެ. އަދި ފުލުހުންގެ އިންފްރާސްޓްރަކްޗަރ ތަރައްޤީކުރުމަށް ރޭވުންތެރިކަމާއެކު މީގެކުރިން މަސައްކަތްތައް ކުރެވިފައި ނެތުމުގެ ސަބަބުން މި މައްސަލަ ހައްލުކުރުމަށް ވަރަށް ބޮޑަށް ދަތިވެފައިވާކަމަށްވެސް ފުލުހުން ވިދާޅުވެއެވެ. ނަމަވެސް ފުލުހުން އެންމެފަހުން އާއްމުކުރި ސްޓެރެޓީޖިކް އެކްޝަން ޕްލޭންގައި ވަނީ ނުރައްކާތެރި ކުށްތަކާއި ދެކޮޅަަށް ހާއްސަ މަސައްކަތްތަކެއް ކުރުމަށް ނިންމާފައެވެ. އެގޮތުން މަސްތުވާތަކެއްޗާއި ގޭންގުތަކާއި ދެކޮޅަށް މަސައްކަތްކުރުމަށް ފުލުހުންގެ ތެރޭގައި ހާއްސަ ޑިޕާޓްމަންޓެއް އުފެއްދުމަށްވެސް ވަނީ ނިންމާފައެވެ.