މިއަދުގެ ހުކުރު ޚުތުބާގައި ބުނެފައިވަނީ ލަދުވެތިކަމާ ޢިއްފަތްތެރިކަމަކީ، އިސްލާމްދީނުގައި ވަރަށް ބޮޑަށް ބާރުއަޅުއްވައިފައިވާ މަތިވެރި ދެ ސިފަ ކަމަށެވެ. ލަދުވެތިކަމުގެ މި މާތް ސިފައިގެ މުހިންމުކަމުން ކީރިތި މާތް ނަބިއްޔާ މި ސިފަ ގެންނަވައިފައި ވަނީ އީމާންކަމުގެ ތެރެއިންކަން ޚުތުބާގައި ފާހަގަ ކޮށްފައިވެއެވެ.

ލަތުވެތިކަން ހުރެއްޖެ މީހާ، އިފަތްތެރިކަން އިސްކުރާނެކަން ފާހަގަކޮށް ޚުތުބާގައި ބުނެފައިވަނީ، އެމީހަކު ވެރި ރަސްކަލާނގެއަށް ބިރުވެތިވެ އޭނާގެ ހަވާނަފްސުގެ އެދުންތައް މައިތިރިކުރާނެ ކަމަށެވެ. އަދި މިއަދު އަހަރެމެންގެ ތެރެއިން ބައެއް މީހުން ލަދުވެތިކަމާއި އިއްފަތްތެރިކަމުގެ ސިފައިން ބޭރުވެފައިވާ ތަން ފެނުމަކީ ހިތާމައެއް ކަމަށްވެސް ހުތުބާގައި ބުނެފައިވެއެވެ.

"ހެދުން އެޅުމާއި، މުޢާމަލާތުކުރުމާއި، ދިރިއުޅުމުގެ ކަންކަމުގެ ތެރެއިން މި މާތް ސިފަ ނެތެމުންދާ ތަން ފެނުމެވެ. މީސް މީޑިއާގެ އެކިއެކި މަންސަތަކުގައި މީސްތަކުން ޙަރަކާތްތެރިވަމުން އެ ދަނީ ލަދުވެތިކަމުގެ ފޭރާން އެކީއެކަށް އެއް ފަރާތް ކުރުމަށްފަހުއެވެ. އެކިއެކި ފާޙިޝް މަންޒަރުތައް ހިމެނޭ ވީޑިއޯ ފަދަ ތަކެތި ހިއްސާކުރަމުން އެ ދަނީ ހިތުގައި ކުޑަ ވެސް ބިރުވެތިކަމެއް ނެތިއެވެ." ޚުތުބާގައި ބުނެފައިވެއެވެ.

Advertisement

މީގެއިތުރުން ޚުތުބާގައި ބުނެފައިވަނީ ލަދުވެތިކަމާއި ޢިއްފަތްތެރިކަމަކީ، ކޮންމެ މުސްލިމެއްގެ ކިބައިގައި ވެސް ކޮންމެހެން ހުރުން ލާޒިމު ސިފައެއް ކަމަށެވެ. އަދި މުޖުތަމަޢެއްގެ އަޚްލާޤީ މިންތަކާއި އިޖްތިމާއީ ފޭރާން ބިނާވެފައިވާ މައިގަނޑު އެއް ސިފައަކީ ލަދުވެތިކަމުގެ ސިފަކަންވެސް ފާހަގަ ކޮށްފައިވެއެވެ.