ރާއްޖޭގައި އުޅޭ ބިދޭސީންގެ މައުލޫމާތު އެއްކުރަން ފަށާފައިވާ "ކުރަނގި" އޮޕަރޭޝަން މުޅި ރާއްޖެއަށް ފުޅާކުރުމުގެ ގޮތުން މި މަސައްކަތަށް ހުރިހާ ކައުންސިލްތަޖެއް ތަމްރީނު ކުރުމުގެ ޕްރޮގުރާމެއް މި މަހު ފަށަން ނިންމައިފި އެވެ.

މިކަމާ ބެހޭ ގޮތުން ހޯމްލޭންޑް މިނިސްޓްރީގެ ޑެޕިއުޓީ މިނިސްޓަރު އަޝްރަފް މުޙައްމަދު ޢަލީ ދައުލަތުގެ މީޑިއާ، ޕީއެސްއެމްގައި ވިދާޅުވީ ކައުންސިލްތައް ތަމްރީނު ކުރުމުގެ ޕްރޮގްރާމެއް މި މަހުގެ-20 އަށް ކުރިއަށް ގެންދަން ރަޭވިފައިވާ ކަމަށެވެ.

އަދި އެއަށް ފަހު ބައޯމެޓްރިކްސް ޑޭޓާ ނެގުމަށް ބޭނުންވާ ވަސީލަތްތައް ކައުންސިލްތަކަށް ފޯރުކޮށްދީ ބިދޭސީންގެ މައުލޫމާތު އެއްކުރުމުގެ މަސައްކަތް ކުރިއަށް ދާނީ ކައުންސިލާއި ފުލުހުންގެ ބެލުމުގެ ދަށުން ކަމަށް ވެސް ވިދާޅި އެވެ.

Advertisement

"ބިދޭސީންގެ މަޢުލޫމާތު އެއްކޮށް ބަޔޯ މެޓްރިކް މަޢުލޫމާތު ރައްކާކުރެވޭނެ ޑިވައިސްތައް މިހާރު އަޅުގަނޑުމެން އަތުގައި އެބަހުރި ހަމަ ދެވޭނެ ވަރަށް. އަދި މިކަމުގެ ޕޯޓަލް ބޭނުންކުރާނެ ގޮތާއި އަދާހަމަކުރާނެ ގޮތްތައް ތަމްރީންގެ ތެރެއިން ބުނެދިނުމުން ކައުންސިލްތަކާއި ފުލުހުން ގުޅިގެން މިމަސައްކަތް ރަށްރަށުގައި ކުރާނީ،" އަޝްރަފު ވިދާޅުވި އެވެ. "އަދި އެކަމުގައި ބޭނުން ވާނެ އެހީތެރިކަން ދޭން ވުޒަރާ އޮންނާނީ ތައްޔާރަށް."

"ކުރަނގި" އޮޕަރޭޝަން އަދި ހިންގީ ދެ ރަށެއްގަ އެވެ. އެއީ ކ. މާފުއްޓާއި ހިންމަފުށީގަ އެވެ. އެގޮތުން ހިންމަފުށިން ދިރިއުޅޭ 705 ބިދޭސީންގެ މައުލޫމާތާއި މާފުށީގައި ދިރިއުޅޭ 1،076 ބިދޭސީންގެ މައުލޫމާތު ނަގާފައިވެ އެވެ.

"ކުރަނގި" އޮޕަރޭޝަންގެ މަގުސަދަކީ ގަވާއިދާ ޚިލާފަށް އުޅޭ ބިދޭސީންގެ މައްސަލައަށް ތިން އަހަރު ދުވަހުގެ ތެރޭގައި ހައްލު ހޯދުމެވެ. އެގޮތުން މަރުހަލާތަކަކަށް ކުރިއަށް ގންދާ އޮޕަރޭޝަންގެ ފުރަތަމަ މަރުހަލާގައި، ބިދޭސީ މަސައްކަތްތެރިންގެ މައުލޫމާތު އަހަރު ދުވަހުގެ ތެރޭގައި އެއްކުރާނެ އެވެ.

ފުރަތަމަ މަރުހަލާ ނިމުމަށްފަހު ރަސްމީ ލިޔެކިޔުން ނެތި، ގަވާއިދާއި ޚިލާފަށް އުޅޭ ބިދޭސީންގެ ބަޔޯމެޓްރިކް އައިޑެންޓިފިކޭޝަނެއް ހަދައި، ގައުމުތަކުގެ އެމްބަސީތަކާއި ގުޅިގެން އެމީހުން އަނބުރާ ގައުމަށް ފޮނުވައިލެވޭނެ ކަމަށް ހޯމްލޭންޑް މިނިސްޓަރީން ބުންޏެވެ.