ފަންނުވެރިންނަށް އެހީތެރިވުމުގެ ގޮތުން އަންނަ އަހަރުން ފެށިގެން ކޮންމެ އަހަރަކު ވެސް ބަޖެޓުގައި 25 މިލިއަން ރުފިޔާ ހިމަނުއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް މުއިއްޒު މިހެން ވިދާޅުވީ މޯލްޑިވިއަން އާޓިސްޓް ކޮމިއުނިޓީއާއި ނެޝަނަލް އާޓް ގެލަރީ ގުޅިގެން "އަންވެއިލިން ވިޒަންސް 2024"ގެ ނަމުގައި ކުރިއަށް ގެންދާ އެގްޒިބިޝަނަށް މިރޭ ވަޑައިގެން އާޓިސްޓުންނާ ބައްދަލުކުރައްވާ ދެއްކެވި ވާހަކަފުޅުގަ އެވެ.

ރައީސް ވިދާޅުވީ މި ސަރުކާރުން ފަންނުވެރިންނަށް ބޭނުންވާ އެހީތެރިކަން ފުރިހަމައަށް ފޯރުކޮށްދެމުންދާނެ ކަމަށާއި އެގޮތުން ކުރެހުމުގެ ފަންނު ދަސްކުރަން ބޭނުންވާ ފަރާތްތަކަށް އެފުރުސަތު ސަރުކާރުން ހަމަޖައްސައިދީ، އެކަމަށް ބޭނުންވާ މާލީ އެހީތެރިކަން ސަރުކާރުން ފޯރުކޮށްދޭނެ ކަމަށެވެ. އެގޮތުން އަމިއްލަ ފަންނާނުންނާއި ޖަމިއްޔާތަކަށްވެސް މާލީ އެހީތެރިކަން ސަރުކާރުން ފޯރުކޮށްދޭނެ ކަމަށް ރައީސް ވިދާޅުވި އެވެ.

Advertisement

ފަންނުވެރިންނަށް ބޭނުންވާ އެކި ކަހަލަ އާލާތްތައް ހޯދުމަށް ބޭނުންވާ ފަންޑު މީގެ ތެރޭގައި ހިމެނޭނެ ކަމަށާއި އަދި އެހެނިގެން ގޮތްގޮތުން ކުރިޔަށްދިޔުމަށް ވަކި ބަޖެޓެއް ކަނޑައަޅާ އަންނަ އަހަރުން ފެށިގެން އެފުުރުސަތު ހޯދައިދޭނެ ކަމަށްވެސް ވިދާޅުވި އެވެ.

"އަންނަ އަހަރުން ފެށިގެން ޔޫތު މިނިސްޓްރީގެ ބަޖެޓްގެ ތެރެއިން މި އިންޑަސްޓްރީއަށް ޚަރަދުކުރަން ގްރާންޓްގެ ގޮތުގައި ކަނޑައެޅޭ އުސޫލުގެ ތެރެއިން ކޮންމެ އަހަރަކު 25 މިލިއަން ރުފިޔާ ހަމަޖައްސައިދޭނަން،" ރައީސް ވިދާޅުވި އެވެ.

ރައީސް ވިދާޅުވީ ނެޝަނަލް އާޓް ގެލެރީގެ އިތުރުން ހުޅުމާލޭގައި ގާއިމްކުރަން ނިންމާފައިވާ ޔޫތު މިނިސްޓްރީގެ ކަންކަމަށް ޚާއްސަ އިމާރާތުގެ ދަށުން ވެސް ފަންނުވެރިންނަށް ޚާއްސަ ބޮޑު ޖާގައެއް ހަމަޖައްސައިދޭނެ ކަމަށެވެ. އަދި ރާއްޖެއާއި ރާއްޖޭން ބޭރުގެ އެކި ސަރަހައްދުތަކުގައި ވެސް މައުރަޒު ބޭއްވުމަށް ފުރުސަތުތައް ފަހިކޮށްދޭނެ ކަމަށާއި ފަންނާނުންގެ އުފެއްދުންތައް ޑިޖިޓަލް ޕްލެޓް ފޯމުގައި ވިއްކުމުގެ އިންތިޒާމު ހަމަޖައްސައިދެއްވާނެކަމަށް ވެސް ރައީސް ވިދާޅުވި އެވެ.