ރާއްޖޭގެ 23 ސްކޫލެއްގައި އޯ ލެވެލް ނިންމާ ހުރިހާ ދަރިވަރުންނަށް އޭ ލެވެލް އަށް ކިޔެވުމުގެ ފުރުސަތު ދޭން ނިންމައިފި އެވެ.

ރޭ ބޭއްވި ސީއެޗްއެސްއީގެ އަހަރީ އިނާމު ދިނުމުގެ ޖަލްސާގައި އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ވިދާޅުވީ މަތީ ތަޢުލީމުގެ ފުރުސަތު ފަހިކޮށް ދިނުމަށް ކުރިމަތިވާ އެންމެ ބޮޑު މައްސަލައަކީ ސާނަވީ އިމްތިހާނުތަކުން ގިނަ ދަރިވަރުން ފާސްނުވުމުގެ މައްސަލަ ކަމަށެވެ.

އެހެންވެ ރާއްޖޭގެ 23 ސްކޫލެއްގައި ސާނަވީ އިމްތިހާނު ނިންމާ ހުރިހާ ކުދިންނަށް ސްކޫލްގެ ޖާގަ އޮތް މިންވަރަކުން އޯ ؛ލެވެލް އަށް ކިޔެވުމުގެ ފުރުސަތު ފަހިކޮށް ދިނުމަށް ސަރުކާރުން ނިންމާފައިވާ ކަމަށް ވިދާޅުވިއެވެ.

Advertisement

"އަޅުގަނޑުމެންނަށް މިހާރު ކުރިމަތިވާ މައްސަލައަކީ ޔުނިވަރސިޓީ ތަޢުލީމަށް ވަދެވޭ ފެންވަރަށް ދެހާހެއްހާ ދަރިވަރުން އަދިވެސް ފާސްނުކުރެވިގެން މި އުޅެނީ،" މިނިސްޓަރު ވިދާޅުވި އެވެ. "ރައީސުލްޖުމްހޫރިއްޔާގެ ވިސްނުންފުޅަކީ މިކަން ބަދަލުކޮށް ފާސްވާ ނިސްބަތް މަތިކުރުން. އެހެންކަމުން އަޅުގަނޑުމެން މި އަހަރު ރާއްޖޭގެ 23 ސްކޫލަކަށް އޯ ލެވެލް ނިންމާ ހުރިހާ ދަރިވަރުންނަށްހެން އޭ ލެވެލްއަށް ވަދެވޭނެ ގޮތް ހަދައި ދޭނަން."

ޝަފީއު ވިދާޅުވީ މިހާރު އޮތް ގޮތުން ދެ މާއްދާއިން ފާސްވާ ދަރިވަރުންނަށް ވެސް މަތީ ސާނަވީއަށް ކިޔެވުމުގެ ފުރުސަތު ލިބޭނެ ކަމަށެވެ. އަދި ސްކޫލްތަކުގައި ޖާގަ އޮތް މިންވަރަކުން އެއް މާއްދާއިން ފާސްވާ ދަރިވަރުންނަށް ވެސް އެ ފުރުސަތު އޮންނާނެ ކަމަށް ވިދާޅުވިއެވެ.

މިނިސްޓަރު ވިދާޅުވީ މިއީ މިއީ ބޭކާރު ޚަރަދަކަށް ވެދާނެ ކަމަށް ބައެއް މީހުން ގަބޫލުކޮށްފާނެ ކަމެއް ކަމަށެވެ. ނަމަވެސް މިއީ ޤައުމީ އުފެއްދުންތެރިކަން އިތުރުކޮށް ކުދިންގެ ކިބައިގައި ހުރި ހުނަރު ކުރިއެރުވުމަށް ފުރުސަތު ދިނުން ކަމަށް ސަރުކާރުން ދެކޭ ކަމަށް ވިދާޅުވި އެވެ.