ދިވެހި ގައުމިއްޔަތުގެ ކޮލެޖެއް އުފައްދަން ސަރުކާރުން ނިންމާފައިވާ ކަމަށް ދިވެހި ބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަސީރު އިބްރާހީމް މިރޭ ވިދާޅުވެއްޖެ އެވެ.

މިކަމާ ގުޅޭގޮތުން ރޭ "އެސްއެސްޓީވީ" ގައި ވާހަކަދައްކަމުން ނަސީރު ވިދާޅުވީ ދިވެހި ގައުމިއްޔަތުގެ ކޮލެޖެއް އުފައްދަވަން ރައީސް ޑރ. މުހައްމަދު މުއިއްޒު ނިންމަވާފައިވާ ކަމަށާއި މި ކޮލެޖު އުފައްދަނީ "ދިވެހި ގައުމިއްޔަތުގެ އިސްވަރު"ގެ ނަމުގައި ކަމަށެވެ. މި ކޮލެޖަކީ މިއީ ކިޔަވައިދޭ ކޮލެޖެއް ނޫން ކަމަށާއި މިއީ ވަކި ކަހަލަ ދިރާސާތަކެއް ކުރާ އަދި ވަކި ކަހަލަ މަސައްކަތް ކުރާ އިލްމީ ޖަމާއަތެއް ކަމަށް ނަސީރު ވިދާޅުވި އެވެ.

"މިއީ މީހުންގެ ކޮލެޖެއް. މީގައި ތިބޭނީ އެކުލެވޭ މީހުންތަކެއް. އެކަމަކު އެއީ އެކި ދާއިރާތަކުން، އެކި ރޮގުރޮގުން ރާއްޖެ ދެކެފައިވާ ހަރު ބޭފުޅުން،" ނަސީރު ވިދާޅުވި އެވެ.

Advertisement

ނަސީރު ވިދާޅުވީ މިއީ ރާއްޖޭގައި މިހާރު ހުރި ކޮލެޖުތަކާއި ހިލާފަށް ކްލާސްތަކެއްހެން ކިޔަވައިދޭނެ ކޮލެޖެއް ނޫން ކަމަށާއި ގައުމިއްޔަތާއި ބެހޭ ބައިތައް ކިޔަވައިދިނުން ކުރިއަށްދާނީ ދިރާސާކުރާ މަރުކަޒުގައި ކަމަށެވެ.

މީގެއިތުރުން ދިވެއްސަކަށް ވަނީ ކިހިނެތްކަމާއި ދިވެހި ފަސްގަނޑާ އޮތް ގުޅުމަކީ ކޮބައިކަމާއި، ތާރީޚާ ސަގާފަތް އެނގެމުން ދިޔަވަރަކަށް ދިވެހިން ގައުމަށް ވަފާތެރިވެ، ފިކުރު ކުރާނެ ކަމަށްވެސް ވަޒީރު ވިދާޅުވި އެވެ.