އަލްހާން ފަހުމީގެ ހިއްސާ އޮންނަ "ކިންގްސް ކެޕިޓަލް ހޯލްޑިންސް" އިން ޕޮންޒީ ސްކީމެއް ހިންގި މައްސަލައިގެ ޝަރީއަތް ފަށައިފިއެވެ.

މި މައްސަލައިގައި ދައުވާ ކޮށްފައިވަނީ އަލްހާން ފަހުމީގެ އިތުރުން އޭނާގެ ކޮއްކޮ ޝަހުބާން ފަހުމީ އާއި ޝަޒްބާން ފަހުމީގެ މައްޗަށް ކަމަށެވެ. މިއިން ކޮންމެ މީހެއްގެ މައްޗަށް ވަނި ޓެކުމުގެ 13 ދައުވާ ކޮށްފައެވެ.

މި މައްސަލައިގައި މީގެކުރިން ބޭއްވި އަޑުއެހުމުގައި މި ތިން މީހުނަށްވަނީ ވަކީލަކު ހަމަޖެއްސުމުގެ ފުރުސަތު ދީފައެވެ. މިއަދު ބޭއްވި އަޑުއެހުމުގައި އޮތީ ދައުވާތައް އިއްވުމާއި ދައުވާތަކަށް ޖަވާބުދާރީވުމެވެ. ދައުލަތުގެ ފަރާތުން މިއަދުގެ އަޑުއެހުމުގައި ދައުވާތައް އިއްވާފައިވެއެވެ. އަދި ދައުވާއަށް ޖަވާބުދާރީވުމަށް އިތުރު 15 ދުވަހުގެ މުއްދަތެއް ވަނީ ދެއްވާފައެވެ.

Advertisement

މައްސަލަ ބައްލަވާ ގާޒީ ވިދާޅުވީ އަންނަ މަހުގެ މެދު ތެރޭ ނުވަތަ ފަހުކޮޅު މި މައްސަލައިގައި އިތުރު އަޑުއެހުމެއް ބާއްވާނެ ކަމަށެވެ.

ޕޮންޒީ ސްކީމްގެ މައްސަލައިގައި އަލްހާނާއި އޭނާގެ ދެކޮއްކޮގެ މައްޗަށް ދަޢުވާތައް ކޮށްފައިވަނީ އެމީހުންގެ އާއިލީ ކުންފުންޏެއްކަމަށްވާ ކިންގްސް ކެޕިޓަލް ހޯލްޑިވްސް އިން 2021 އަދި 2022 ވަނަ އަހަރު ތެރޭގައި އާންމުންނަށް ހުޅުވާލައިގެން ކުރިއަށް ގެންދިޔަ ކިންގްސް ފޮރެކްސް ޓްރޭޑިންގެ އިންވެސްޓްމަންޓްގެ އެކި ޕެކޭޖްތަކުން މާލީ މަންފާއެއް ހޯދައިދޭނެކަމަށް ދައްކައިގެން، އާންމު އެކި މީހުން އަތުން އެކި އަދަދުތަކުން ފައިސާ ނެގުމަށްފަހު، އެ ފައިސާއިން ކޮށްދޭން އެއްބަސްވި ކަންތައް ކޮށްނުދީ ފައިސާ ޓަކައިގެންފައިވާތީ ކަމަށް ޕީޖީ އޮފީހުން މީގެކުރިން ބުނެފައިއެވެ.