ބޯކޮށާ ތަންތަނަށް އަމާޒުކޮށްގެން 6 ތަނެއް ބަލައި 7 ބިދޭސީ އަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.

މިކަން ހާމަކޮށް އިމިގްރޭޝަނުން އެކްސްގައި ޕޯސްޓެއް ކޮށްފައިވެއެވެ. އެ ޕޯސްޓުގައި ބުނެފައިވަނީ ބޯކޮށާ ތަންތަނަށް އަމާޒުކޮށްގެން 6 ތަނެއް ބަލައި ފާސްކޮށްފައިވާ ކަމަށާއި މި ހަ ތަނަކީ ހުޅުމާލޭގެ ތަންތަން ކަމަށެވެ.

ބަލައި ފާސްކުރި 6 ތަނުގެ ތެރެއިން 4 ތަނެއް ބަންދު ކޮށްފައިވާ ކަމަށާއި ގަވާއިދާ ހިލާފަށް އުޅޭ 07 ބިދޭސީއަކު އިމިގްރޭޝަން ބެލުމުގެ ދަށަށް ގެންގޮސްފައި ވާކަމަށް އިމިގްރޭޝަނުން ބުނެއެވެ.

Advertisement

ރާއްޖޭގައި ގަވާއިދާ ހިލާފަށް ދިރިއުޅޭ ބިދޭސީންގެ މައްސަލައަކީ ބޮޑުވެފައިވާ މައްސަލައެކެވެ. މި މައްސަލަ ހައްލު ކުރުމަށް ފުލުހުންނާއި އިމިގްރޭޝަނުން ގުޅިގެން ދަނީ ހާއްސަ އޮޕަރޭޝަންތަކެއް ކުރިއަށް ގެންދަމުންނެވެ. މި އޮޕަރޭޝަން ތަކުގައި 150 އަށް ވުރެ ގިނަ ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފައިވެއެވެ.

މި އޮޕަރޭޝަންތަކުގައި އިމިގްރޭޝަންގެ ބެލުމުގެ ދަށަށް ގެންދާ އެއްވެސް ބިދޭސީ އަކަށް ދެވަނަ ފުރުސަތެއް ނުދޭނެ ކަމަށާއި އަދި މި ބިދޭސީން ކަމާގުޅޭ ފަރާތްތަކާ ގުޅިގެން ޑީޕޯޓުކުރުމުގެ މަސައްކަތް ކުރާ ކަމަށް މީގެ ކުރިން އިމިގްރޭޝަނުން ބުނެފައިވެއެވެ.

ގަވާއިދާ ހިލާފަށް ރާއްޖޭގައި މަސައްކަތްކުރާ އަދި ވިޔަފާރި ކުރާ ބިދޭސީން ރިޕޯޓުކުރުމަށް ހާއްސަކޮށްގެން އިމިގްރޭޝަން ވޮޗް ނަމަކަށް ކިޔާ އޮންލައިން ޕްލެޓް ފޯމެއް ވެސް އިމިގްރޭޝަނުން ތައާރަފްކޮށްފައިވެއެވެ. މި ޕްލެޓްފޯމުން ލިބޭ މައުލޫމާތަށް ރިއާޔަތްކޮށް ވެސް ފުލުހުންނާއި އިމިގްރޭޝަނުން އޮޕަރޭޝަންތައް ކުރިއަށް ގެންދެއެވެ.