އެމްޑީޕީ ހިންގާފައިވަނީ އެއްވެސް ނިޒާމެއްގެ ތެރެއިން ނޫންކަމަށް ޗެއަރޕާސަން އަލްއުސްތާޛް ފައްޔާޟް އިސްމާޢީލް ވިދާޅުވެއްޖެއެވެ.

އެމްޑީޕީގެ އަސާސީ ޤަވާއިދަށް ހުށަހެޅި ބައެއް އިޞްލާހުތަކާއި ގުޅޭގޮތުން ވާހަކަދައްކަވަމުން އެމްޑީޕީގެ ޗެއަރޕާސަން ފައްޔާޟް އިސްމާޢީލް ވިދާޅުވީ އެ ޕާޓީ މިހާތަނަށް ހިންގާފައިވަނީ އެއިރެއްގެ ލީޑަރަކަށް ފެނިވަޑައިގެންނެވި ގޮތަށް ކަމަށެވެ. އެހެންކަމުން އެމްޑީޕީގެ ހިންގުން ވަރުގަދަނުކޮށް ކުރިއަށް ދެވެން ނެތްކަން ފާހަގަކުރައްވާ ފައްޔާޟް ވަނީ މީގެ ކުރިން ޕާޓީ ހިންގާފައިވަނީ އެއްވެސް ނިޒާމެއްގެ ތެރެއިން ނޫންކަމަށް ވިދާޅުވެފައެވެ.

އެމްޑީޕީގެ އާސާސީ ޤަވާއިދަށް ބަދަލު ގެންނަން ހުށައެޅި ކަންކަމުގެ ތެރޭގައި އެޕާޓީގެ ހަރަކާތްތައް އިތުރަށް ވަރުގަދަ ކުރުމަށް އިތުރު 3 ގުނަވަނެއް ޕާޓީގެ ތެރޭގައި އުފެއްދުމަށް ވަނީ ހުށަހަޅާފައެވެ. އެއީ ކައުންސިލަރުންގެ ވިންގާއި، އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ ވިންގުގެ އިތުރުން، ޕާޓީ ޤައުމީ މަޝްވަރާ މަޖިލީސް ޤާއިމްކުރުމެވެ.

Advertisement

މި އިސްލާހުތަކަށް އިތުރަށް މަޝްވަރާ ކުރުމަށް ޤައުމީ މަޖިލީހުގައިވަނީ ނިންމާފައެވެ. އަދި އެމްޑީޕީ ވަކި ނިޒާމެއްގެ ތެރެއިން މަސައްކަތް ކުރާ ޕާޓީއަކަށް ހެދުމަށް އެޕާޓީގެ ލީޑާޝިޕުން މިހާރު ވަނީ އަމާޒު ހިފާފައެވެ.