ޤަވާއިދާ ޚިލާފަށް ވިޔަފާރިކޮށް، ސައްޙަ ވިސާއެއްނެތި އުޅެމުންދާ ބިދޭސީން ދެނެގަތުމަށް ކުރިއަށްގެންދާ އޮޕަރޭޝަން، އަތޮޅުތަކަށް ފުޅާކުރެއްވުމަށް މަސައްކަތްކުރައްވަމުން ގެންދަވާކަމަށް ކޮންޓްރޯލަރ ޖެނެރަލް އޮފް އިމިގްރޭޝަން، މުޙައްމަދު ޝަމްޢާން ވަޙީދު ވިދާޅުވެއްޖެއެވެ.

ކޮންޓްރޯލަރ ޖެނެރަލް މިހެން ވިދާޅުވީ، މާލެ ސަރަޙައްދުގައި ކުރިއަށްގެންދިޔަ ޤަވާއިދާ ޚިލާފަށް އުޅޭ ބިދޭސީން ހޯދައި އަދި އުޅޭ ސަރަހައްދުތައް ދެނެގަތުމުގެ އޮޕަރޭޝަނާ ގުޅޭ މަޢުލޫމާތު މީޑީއާއާ ޙިއްސާކުރައްވަމުންނެވެ.

ޝަމްޢާން ވިދާޅުވީ އިމިގްރޭޝަނުގެ 211 އޮފިސަރުން މަގުތަކަށް ނިކުމެ ކުރިއަށްގެންދިޔަ މާސް އިންސްޕެކްޝަނުން ގަވާއިދާ ޚިލާފަށް ޢަމަލުކުރަމުންދާ ގިނަ ޢަދަދެއްގެ ބިދޭސީން ފާހަގަކުރެވިފައިވާކަމަށެވެ. މީގެ ތެރެއިން ބައެއް މީހުން އިމިގްރޭޝަންގެ ބެލުމުގެ ދަށަށް ގެންގޮސްފައިވާކަމަށްވެސް ޝަމްޢާން ވިދާޅުވިއެވެ. އަދި ގަވާއިދާ ޚިލާފަށް ހިންގަމުންދިޔަ ބައެއް ވިޔަފާރިތަކަށް ގަވާއިދުގެ ތެރެއަށް ވަނުމަށް 1 މަސްދުވަހުގެ މުއްދަތެއް ދެވިފައިވާ ކަމަށާއި، މި މުއްދަތު ހަމަވާއިރު އެ އެތަންތަން ގަވާއިދާ އެއްގޮތަށް ޢަމަލުކުރަން ނުފަށައިފިނަމަ، އެ ފިޔަވަޅުއަޅާނެކަމުގެ އިންޒާރުވެސް ދީފައިވާކަމަށް ކޮންޓްރޯލަރ ޖެނެރަލް އޮފް އިމިގްރޭޝަން ވިދާޅުވިއެވެ.

Advertisement

ވާއިދާ ޚިލާފަށް މާލެ ސަރަހައްދުގައި ދިރިއުޅެމުންދާ ބިދޭސީން، ފިލުމުގެ މަސައްކަތްކުރަމުންދާކަމަށްވެސް ކޮންޓްރޯލަރ ވިދާޅުވިއެވެ. އެގޮތުން ބައެއް ބިދޭސީން ކުޅުދުއްފުށްޓަށް ހިޖުރަކުރަމުންދާކަމުގެ މަޢުލޫމާތު ކައުންސިލުން ދީފައިވާކަންވެސް ޝަމްޢާން ފާހަގަކުރިއެވެ.

ބިދޭސީންގެ މައްސަލަ ޙައްލުކުރުމަކީ ސަރުކާރުން ޚާއްސަ އިސްކަމެއް ދީގެން ކުރިއަށްގެންދާ މަސައްކަތެކެވެ. އެ މަސައްކަތުގެ ދަށުން މާލޭގައި ހިންގާ އޮޕަރޭޝަންގެ އިތުރުން މީހުން ދިރިއުޅޭ އެހެން ރަށްރަށާއި ރިސޯޓުތަކާއި ސިނާއީ ރަށްތަކާއި ދަނޑުވެރިކަމަށް ދޫކޮށްފައިވާ ރަށްތަކުގައި ދިރިއުޅޭ ބިދޭސީންގެ މައުލޫމާތު އެއްކުރުމުގެ މަސައްކަތްވެސް ދަނީ ކުރަމުންނެވެ.