އަންހެނެއްގެ ކަރުގައި ވަޅި ޖައްސައިގެން ބިރު ދެއްކި އާދަމް އަތުހަރު ފުލުހުންގެ ބެލުމުގެ ދަށުގައި ހުއްޓައި އަމިއްލަ އަށް މަރުވާން މަސައްކަތްކުރުމާ ގުޅިގެން ހާލު ދެރަވެ، ހޮސްޕިޓަލުގައި ފަރުވާދެމުން ދަނިކޮށް މިއަދު މަރުވެއްޖެ އެވެ.

މިއަދު ހަވީރު 4:08 ގައި އޭނަ މަރުވީ އައިޖީއެމްއެޗްގެ ވެންޓިލޭޓަރުގައި ރެއިން ފެށިގެން ފަރުވާ ދެމުން ދަނިކޮށެވެ.

ށ. މިލަންދު އަށް ނިސްބަތްވާ 32 އަހަރުގެ އަތުހަރު ފުލުހުންގެ ބެލުމުގެ ދަށަށް ގެންދިޔައީ މިދިޔަ ބުރާސްފަތި ދުވަހުގެ ރޭ މާލޭގައި އޭނަ އަންހެނަކު ރަހީނުކޮށް، ކަރުގައި ވަޅި ޖައްސައި ބިރު ދައްކައިގެން ފިލަން މަސައްކަތް ކުރަނިކޮށް ދަނިކޮށް، ފުލުހުން މުގުރިއަކުން ބޮލުގައި ޖަހައި ޒަހަމްކޮށްލުމަށް ފަހު އެވެ.

Advertisement

އެ ހާދިސާއާ ގުޅިގެން އަތުހަރަށް އޭޑީކޭގައި ފަރުވާ ދިނެވެ. އޭގެ ފަހުން ހުކުރު ދުވަހު ވެސް އައިޖީއެމްއެޗްގައި އޭނަ އަށް ފަރުވާ ދީފައިވެ އެވެެ.

އަތުހަރަކީ ޖަލު ހުކުމެއް ތަންފީޒުކުރަމުން ދަނިކޮށް، ރައީސަށް ލިބިދޭ ބާރުގެ ދަށުން 2022 ގައި މާފުދީ ޖަލުން މިނިވަންކޮށްފައިވާ މީހެކެވެ.

އަތުހަރުގެ މަރާ ގުޅިގެން ފުލުހުން ނެރުނު ބަޔާނެއްގައި ބުނީ އޭނަ މަރުވި ސަބަބު ދެނެގަތުމަށްޓަކައި އޮޓޮޕްސީއެއް ހަދަން ނިންމާފައިވާ ކަމަށެވެ. އަދި މިކަމާ ގުޅޭ ގޮތުން މިނިވަން މުއައްސަސާތަކުން ކުރިއަށް ގެންދާ ތަހުގީގަށް ފުލުހުންގެ ފުރިހަމަ އެއްބާރުލުން އޮންނާނެ ކަމަށް ވެސް ފުލުހުން ބުންޏެވެ.