މުޅި ރާއްޖޭގައި އުފައްދާ ކުނި ނައްތާލުމަށް ގެންދާ މައި ރަށްކަމަށްވާ ތިލަފުށި ފުރިފައިވާތީވެ، އެހެންތަނަކަށް ކުނި ގެންދެވޭނެ އިންތިޒާމެއް ހަމަޖެއްސުމަށް މަސައްކަތް ކުރަމުންދާކަމަށް ވޭސްޓް މެނޭޖްމަންޓް ކޯޕަރޭޝަން، ވެމްކޯގެ މެނޭޖިން ޑިރެކްޓަރ މުޖުތަބާ ޖަލީލް ވިދާޅުވެއްޖެއެވެ.

ދައުލަތުގެ މީޑިއާގެ ޕްރޮގްރާމެއްގައި ވާހަކަފުޅު ދައްކަވަމުން މެނޭޖިން ޑިރެކްޓަރ މުޖުތަބާ ޖަލީލް ވިދާޅުވީ މުޅި ރާއްޖޭގައި އުފައްދާ ކުނީގެ 90 އިންސައްތަ ތިލަފުއްޓަށް ގެންދަން ޖެހޭކަމަށެވެ. މިހާރު ތިލަފުށީގައި ކުނި އަޅާ ސަރަޙައްދު ފުރިފައިވާކަމަށާއި އެކަން ޙައްލުކުރުމަށް އެކި ޕްލޭންތައް ތައްޔާރުކޮށްފައިވާކަމަށެވެ. މިމައްސަލައަށް ހައްލެއް ގެނައުމަށް ސަރުކާރާއެކު މަޝްވަރާކޮށްފައިވާކަމަށެވެ. ކުރިއަށް އޮތް 6 މަސްދުވަހުގެ ތެރޭގައި ހައްލުތަކެއް ގެނެވޭނެކަމަށް އުންމީދުކުރައްވާކަމަށް މުޖުތަބާ ވިދާޅުވިއެވެ.

މުޖުތަބާ ވިދާޅުވީ މާލެ ސަރަޙައްދަކީ ރާއްޖޭގައި އެންމެ ގިނައިން ކުނި އުފައްދާ ސަރަޙައްދުކަމަށާއި މާލެ ކައިރިން ތަނެއް ހަމަޖެއްސުމަކީ މުހިންމުކަމެއްކަމަށެވެ.

Advertisement

ތިލަފުއްޓަށް ކޮންމެ ދުވަހަކު 1000 ވުރެ ގިނަ ޓަނުގެ ކުނި ޖަމާކުރެއެވެ. ތިލަފުށީގައި ޤާއިމުކުރާ ކުނި އަންދައިގެން ހަކަތަ އުފެއްދުމަށް ދުވާލަކު 500 ޓަނުގެ ކުނި އެންދޭވަރުގެ ނިޒާމެއް ޤާއިމްކުރުމުގެ މަސައްކަތް ދަނީ ކުރަމުންނެވެ. ނަމަވެސް ކުނި އުފައްދާ މިންވަރު އިތުރުވުމާއެކު ތިލަފުށީގައި ދުވާލަކު 1000 ޓަނުގެ ކުނި އަންދާއިގެން ހަކަތަ އުފައްދާ ނިޒާމެއް ޤާއިމުކުރައްވާނެކަމަށް މޫސުމީ ބަދަލުތަކާއި ތިމާވެށްޓާއި، ހަކަތައާއި ބެހޭ ވަޒީރު ޠާރިޤް އިބްރާހީމް ވަނީ ވިދާޅުވެފައެވެ. އަދި ކުނި ނައްތާލުމަށް ބޭނުންވާ އިތުރު ބިމެއް ހަމަޖެއްސެވުމަށް މަސައްކަތް ކުރާނެކަމަށްވެސް ވަޒީރު ވަނީ ވިދާޅުވެފައެވެ.