ރާއްޖޭގެ ކާބޯތަކެތީގެ ރައްކާތެރިކަން ކަށަވަރުކުރުމަށް އުތުރުތިލަފަޅުގައި ތަރައްގީ ކުރާ އެގްރިކަލްޗާ އިކޮނޮމިކް ޒޯނުގެ މަސައްކަތް އަންނަ އަހަރުގެ ޖެނުއަރީގައި ފަށަން ތައްޔާރުވެފައިވާ ކަމަށް ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. ޢާއިޝަތު ރަމީލާ ވިދާޅުވެއްޖެ އެވެ.

ކާބޯތަކެތީގެ ރައްކާތެރިކަން ރާއްޖޭގައި ގާއިމުކުރުމަށް ރައީސް ޑރ. މުހައްމަދު މުއިއްޒު ގެންގުޅުއްވާ ތަސައްވަރުގެ ދަށުން ދެމެހެއްޓެނިވި ގޮތެއްގައި ދަނޑުވެރިކަން ކުރުމަށް މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން (އެމެއައިޑީ) އާއި ޗައިނާ ހާބަ އިންޖިނިއަރިން ކޮމްޕެނީ ލިމިޓެޑާ އެކު އެގްރިކަލްޗާ އިކޮނޮމިކް ޒޯނެއް ތަރައްގީ ކުރަން މިދިޔަ މާޗު މަހު ވަނީ އެއްބަސްވުމެއްގައި ސޮއިކޮށްފަ އެވެ.

ދައުލަތުގެ މީޑިއާގައި ރޭ ވާހަކަދައްކަމުން މިނިސްޓަރު ރަމީލާ ވިދާޅުވީ އެ ޕްރޮޖެކްޓް މިހާރު އެއްކޮށް އެކުލަވާލާފައިވާ ކަމަށާއި އެގްރިކަލްޗާ ޒޯނު ތަރައްގީ ކުރުމަށް ހަމަޖެހިފައިވަނީ 200 ހެކްޓަރުގެ ބިމެއްގައި ކަމަށްވާއިރު މި ޕްރޮޖެކްޓް ކުރިއަށް ގެންދާނީ ދެ ފިޔަވައްސަކަށް ބަހާލައިގެން ކަމަށެވެ.

Advertisement

އެގޮތުން ފުރަތަމަ ފިޔަވަހީގައި 100 ހެކްޓަރުގެ ބިމުގައި ގްރީން ހައުސްތަކެއް އަޅާނެ ކަމަށާއި އެތަނުގައި އިންދާނެ ކާބޯތަކެތީގެ ބާވަތްތައް މިހާރު ފައިނަލް ކުރެވިފައިވާ އިރު ބޮޑަށް ބަލާފައި ހުންނާނީ އާންމުކޮށް ރާއްޖެ އެތެރެކުރާ ބާވަތްތަކަށް ކަމަށް ރަމީލާ ވިދާޅުވި އެވެ. ދެވަނަ ފިޔަވަހި ހާއްސަކޮށްފައިވަނީ "އޯޕަން ލޭންޑް'ގައި ހެއްދޭނެ ތަކެއްޗަށް ކަމަށާއި އޭގެތެރޭގައި ބޮޑަށް ހުންނާނީ ބިމު އަޑިއަށް ފައިބާ އެއްޗެހި ކަމަށް މިނިސްޓަރު ވިދާޅުވި އެވެ.

"މިސާލަަކަށް ބުނަންޏާ ފިޔާ، އަލުވި، އަޅުގަނޑުމެން އާންމުކޮށް މި އިމްޕޯޓުކޮށްގެން ކޮންމެ ދުވަހެއްގެ ކެއުމުގައިވެސް ބޭނުންކުރާ ބާވަތްތައް އެތަނުގައި ހެއްދޭނެ. އަދި، ފްރުޓް އޯރޗަޑްސް ހުންނާނެ. ގްރީން ހައުސްގައި ބޮޑަށް ހައްދާނީ ގްރީން ހައުސްގައި ހެއްދޭކަހަލަ ބަވާތްތަކުގެ ތެރެއިންވެސް އަޅުގަނޑުމެން ގިނައިން މި އެތެރެކުރާ ބާވަތްތައް،". ރަމީލާ ވިދާޅުވި އެވެ.

މީގެއިތުރުން މި ޕްރޮޖެކްޓުގެ ދެވަނަ ފިޔަވަހީގައި ކުކުޅު ގެންގުޅުމާއި ކުކުޅު ބިސް އުފެއްދުމަށް ޚާއްސަ ޕޯލްޓްރީއެއް ގާއިމުކުރުން ވެސް ހިމެނޭ ކަމަށް ވިދާޅުވި އެވެ. މިއީ ކާބޯތަކެތި އަބަދުވެސް ލިބެން ހުންނާނެކަން ޔަގީންވާނެ ފަދަ އުއްމީދީ ޕްރޮޖެކްޓެއް ކަމަށާއި މި ޕްރޮޖެކްޓުގެ އަމަލީ މަސައްކަތް ޖެނުއަރީގައި ފެށިގެންދާނެ ކަމަށް ރަމީލާ ވިދާޅުވި އެވެ.