އިންޓަނޭޝަނަލް މަނިޓަރީ ފަންޑު (އައިއެމްއެފް) ގެ ޕްރޮގްރާމެއްގައި ދިވެހި ސަރުކާރުން ބައިވެރިވާންޖެހޭ ހާލަތެއް ނެތް ކަމަށް ފޮރިން މިނިސްޓަރު މޫސާ ޒަމީރު ވިދާޅުވެއްޖެ އެވެ.

ރާއްޖޭގެ މާލީ ހާލަތާއި ގުޅޭގޮތުން "ފްރާންސް24" އަށް ދެއްވި އިންޓަވިއުއެއްގައި ޒަމީރު ވިދާޅުވީ ރާއްޖެއަށް މިވަގުތު ކުރިމަތިވެފައިވަނީ ވަގުތީ ދަތިކަމެއް ކަމަށާއި މިއީ އައިއެމްއެފްގެ އެހީތެރިކަން ހޯދުމަށް މަޝްވަރާކުރަންޖެހޭ ފަދަ ހާލަތެއް ކަމަށް ގަބޫލުނުކުރައްވާ ކަމަށެވެ.

އަދި ޓެކުހަށް ގެންނަ އިސްލާހުތަކުންނާއި ދައުލަތުގެ ކުންފުނިތަކުގެ ހިންގުން އިސްލާހުކުރުމުން ސަރުކާރަށް ކުރިމަތިވެފައިވާ ފައިސާ ނެތުމުގެ ދަތިކަމަށް ކުރިއެރުންތަކެއް ލިބިގެންދާނެ ކަމަށްވެސް ޒަމީރު ވިދާޅުވި އެވެ.

Advertisement

ޒަމީރު މިހެން ވިދާޅުވި އިރު ރާއްޖޭގެ މާލީ ހާލަތު ގޯސްވުމާ ގުޅިގެން ކްރެޑިޓް ރޭޓިން ކަނޑައެޅުމުގައި މުޅި ދުނިޔޭގައިވެސް އެންމެ ފާހަގަކުރެވޭ ކުންފުނި — ފިޗް ރޭޓިން އާއި މޫޑީސް އިން ދާދިފަހުން ވަނީ ރާއްޖޭގެ ކްރެޑިޓް ރޭޓިން ދަށްކޮށްފަ އެވެ.

ސަރުކާރުން ވަނީ ރާއްޖޭގެ އިގްތިސާދީ ހާލަތު ރަނގަޅުކުރުމަށް ސަރުކާރުން އަޅާ އިސްލާހީ ފިޔަވަޅުތަކާ އެކު ރޭޓިން ރަނގަޅުވާނެ ކަމަށް ބުނެފަ އެވެ.