ފެނަކަ ކޯޕަރޭޝަންގެ ޗެއަރމަނަކަށް ޝިމާދު އިބްރާހިމް، ހަމަޖައްސަވައިފިއެވެ.

ފެނަކަ ކޯޕަރޭޝަނަކީ ސްޓޭޓް ޓްރޭޑިން އޯގަނައިޒޭޝަން، އެސްޓީއޯގެ ދަށުން ހިންގާ ސަބްސިޑަރީ ކުންފުންޏަކަށް ބަދަލުކުރުމަށް ސަރުކާރުން ވަނީ ނިންމަވާފައެވެ.

ފެނަކަ ކޯޕަރޭޝަނުން ސޯޝަލް މީޑިޔާގައި ހިއްސާކޮށްފައިވާ ޕޯސްޓެއްގައި ވަނީ އެސްޓީއޯގެ މެނޭޖިން ޑިރެކްޓަރ އަދި ސީއީއޯ ޝިމާދު އިބްރާހިމް، ފެނަކަ ކޯޕަރޭޝަންގެ ޗެއަރމަނަކަށް ހަމަޖައްސާފައިވާކަން ހާމަކޮށްފައެވެ.

Advertisement

ފެނަކަ ކޯޕަރޭޝަންގެ ބޯޑަށް އިތުރު ދެ މެންބަރަކުވެސްވަނީ އައްޔަންކޮށްފައެވެ. އެ ދެ މެންބަރުންނަކީ އަޙްމަދު މާޒިންއާއި މުޙައްމަދު ނިޒާމެވެ. މި ދެ ބޭފުޅުންގެ ތެރެއިން މުޙައްމަދު ނިޒާމަކީ އެސްޓީއޯގެ ޗީފް ފައިނެންޝައަލް އޮފިސަރެވެ. އަދި އަޙްމަދު މާޒިންއަކީ މާލީ ވުޒާރާގެ ސްޓޭޓް މިނިސްޓަރެކެވެ.

ފެނަކަ ކޯޕަރޭޝަން ލިމިޓެޑުގެ ހުރިހާ ހިއްސާއެއް، ސްޓޭޓް ޓްރޭޑިންގ އޯގަނައިޒޭޝަން ޕަބްލިކް ލިމިޓެޑް، އެސްޓީއޯއިން ގަނެ މިއަހަރުގެ ނިޔަލަށް އެކުންފުނީގެ ސަބްސިޑަރީ ކުންފުންޏެއްގެ ގޮތުގައި ފެނަކަ ހަމަޖެއްސެވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފާވަނީ މިދިޔަ މަހުގެ 26 ވަނަ ދުވަހުއެވެ.

ރައީސުލްޖުމްހޫރިއްޔާ މިގޮތަށް ނިންމަވާފައިވަނީ ރާއްޖޭގެ ޔުޓިލިޓީ ސެކްޓަރ ހަރުދަނާކުރުމަށާއި ރައްޔިތުންނަށް ފޯރުކޮށްދޭ ޚިދުމަތް ރަނގަޅު ފެންވަރެއްގައި އެފިޝަންޓްކޮށް ފޯރުކޮށްދިނުމާއެކު ފެނަކައިގެ ހިންގުން ހަރުދަނާކޮށް މާލީގޮތުން ބާރުވެރިކުރުމަށްކަމަށް ސަރުކާރުން ވިދާޅުވެފައިވެއެވެ.

ފެނަކައަކީ އެސްޓީއޯގެ ސަބްސިޑަރީ ކުންފުންޏަކަށް ބަދަލުކުރުމުގެ މަރުޙަލާ ކުރިއަށް ގެންދިއުމަށް ނިންމާފައިވަނީ މާލީ ވުޒާރާއާއި ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު އަދި އެސްޓީއޯގެ ބޭފުޅުން ހިމެނޭ ކޮމިޓީއެއް އުފެއްދުމަށްފަހުއެވެ. މިއީ މި ބަދަލާގުޅޭ މައުލޫމާތު ހިއްސާކުރުމަށާއި ބަދަލު ގެނައުމަށްޓަކައި ކުރަންޖެހޭ މަސައްކަތްތައް ކުރުމަށް އުފައްދާ ކޮމިޓީއެކެވެ. ސަރުކާރުގެ އަމާޒަކީ މިއަހަރު ނިމުމުގެ ކުރިން ފެނަކައަކީ އެސްޓީއޯގެ ދަށުން ހިންގާ ކުންފުންޏަކަށް ބަދަލުކުރުމެވެ.