ދިވެހިރާއްޖޭގެ ދަޢުލަތުގެ ނިޝާނާ ޤައުމީ ދިދަ ހިމާޔަތްކުރުމަށް ޤާނޫނެއް ހެދުމުގެ މަސައްކަތް ކުރަމުން އަންނަ ކަމަށް ދިވެހި ބަހާއި ސަޤާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހިމް ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި، ދިވެހި ބަހާއި ތަރިކައާ ބެހޭ ވުޒާރާގެ މަސައްކަތްތަކާ ގުޅޭގޮތުން މައުލޫމާތު ހިއްސާ ކުރައްވާ ވަޒީރު އާދަމް ނަޞީރު ވިދާޅުވީ ދައުލަތުގެ ނިޝާނުގެ އިންތަކާއި މިންތައް ކަނޑައަޅާފައިވާ ހަމަތައް ގާނޫނުގައި މިވަގުތު ނެތްކަމަށެވެ. އެހެންކަމުން، ދައުލަތުގެ ނިޝާނާއި ދިވެހި ދިދަ އަށް ވެސް ޤާނޫނީ ހިމާޔަތް ބޭނުންވާ ކަމަށް ވަޒީރު ވިދާޅުވިއެވެ.

މީގެ އިތުރުން ވަޒީރު ވިދާޅުވީ ދިވެހި ދަޢުލަތުގެ ޤައުމީ ނިޝާން ހިމާޔަތްކުރުމަށް ބިލެއް ޑްރާފްޓްކުރުމުގެ މަސައްކަތް ކުރެވެމުންދާކަމަށެވެ. އަދި ރައީސް ޑރ. މުހައްމަދު މުޢިއްޒު ގެންގުޅުއްވާ ސިޔާސަތުގެ ތެރެއިން ދިދަ އަށް ހުރިހާ ގޮތަކުން ހިމާޔަތާއި ރައްކާތެރިކަން ދިނުމާއި ދައުލަތުގެ ނިޝާނަށް ދިވެހިންގެ އިއްޒަތާ ގުޅިފައިވާ ހުރިހާ ކަމެއް ވެސް އެ ބިލުގައި ހިމަނުއްވާނެ ކަމަށެވެ.

Advertisement

މީގެ އިތުރުން ރާއްޖޭގެ އެކި ސަރަހައްދުތަކުގައި ދާރުލްއާސާރުތައް ހެދުމުގެ މަސައްކަތް ކުރުމަށް ސަރުކާރުން ނިންމާފައިވާއިރު، އެކަން ދެމެހެއްޓެނިވި ގޮތެއްގައި ކުރެވޭނެ ކަމަށް ސަރުކާރުން ޤަބޫލު ކުރާކަމށްވެސް ޕްރެސް ކޮންފަރެންސްގައި ވަޒީރު ވިދާޅުވިއެވެ. އެގޮތުން ދުނިޔޭގެ އެހެން ބައެއް ޤައުމުތަކެކޭ އެއްގޮތަށް މިދާއިރާގެ ކަންކަން ފަރުމާކުރެވި ބަދަލު ކުރެވުމުން ރާއްޖޭގައިވެސް ތަރިކައިން އާމްދަނީ ލިބޭނެ ކަމަށް ވަޒީރު ވިދާޅުވިއެވެ. އަދި މިކަން ކުރުމަށް ޒަމާނީ ޓެކްނޮލޮޖީގެ އެހީތެރިކަން ހޯދަން ޖެހޭ ކަމަށް ވިދާޅުވިއެވެ.