ޒަކާތު ފަންޑު 100 މިލިއަން ރުފިޔާ އަށް އިތުރުކުރުމަކީ އަމާޒެއް ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ޝަހީމް ވިދާޅުވީ ޒަކާތަށް ހޭލުންތެރިކުރުވަން ފެށި މަސައްކަތް ވަރަށް ކާމިޔާބު ކަމަށާއި އެގޮތުން މިއަހަރުގެ މިހާތަނަށް 77 މިލިއަން ރުފިޔާ ޒަކާތު ފަންޑަށް ލިބިފައިވާ ކަމަށެވެ. މިއީ އެހެން އަހަރުތަކާއި ބަލާއިރު 11 ޕަސެންޓުގެ ކުރިއެރުމެއް ކަމަށް ޝަހީމް ވިދާޅުވި އެވެ.

"އަޅުގަނޑުމެންގެ އަމާޒަކީ 2025 ގައި 100 މިލިއަން ރުފިޔާއަށް ޒަކާތު ފަންޑު އިތުރުކުރުން. ޒަކާތު ފަންޑު 100 މިލިއަނަށް އިތުރުކުރެވިއްޖެނަމަ އެއީ ޒަކާތުގެ ތާރީހު ރާއްޖޭގައި ބަދަލުކޮށްލެވުން،" ޝަހީމް ވިދާޅުވި އެވެ.

Advertisement

ފަގީރުންގެ ދަފްތަރުގައި މިހާތަނަށް 3884 މީހުން ރަޖިސްޓްރީކޮށްފައިވާ ކަމަށާއި ބޮލަކަށް 4000 ރުފިޔާގެ އަދަދަކުން މި އަހަރު ވަނީ ޒަކާތް ބަހާފައި ކަމަށް ޝަހީމް ވިދާޅުވި އެވެ. އެގޮތުން ޖުމްލަ 12 މިލިއަން ރުފިޔާ ފަގީރުންނަށް ބަހާފައިވާ ކަމަށާއި މިއީ އެހެން އަހަރުތަކާއި އަޅާބަލާއިރު ރެކޯޑު އަދަދެއް ކަމަށް ވެސް ވިދާޅުވި އެވެ.

ޒަކާތު ފަންޑުން މިދިޔަ މަހު އެކަނި ވެސް ވަނީ 130 މީހަކަށް އެހީވެފަ އެވެ. އެގޮތުން ޒަކާތު ފަންޑުން އެހީގެ ގޮތުގައި މިދިޔަ މަހު 733436.60 މިލިއަން ރުފިޔާ ހަރަދުކޮށްފައިވެ އެވެ.

ޒަކާތު ފަންޑުން މިދިޔަ މަހު ބޭސްފަރުވާގެ ހަތަރު ކަމަކަށް ވަނީ އެހީ ފޯރުކޮށްދީފަ އެވެ. އެގޮތުން ކެންސަރު ބައްޔާއި، ހިތުގެ އޮޕަރޭޝަން، ކިޑްނީ ބަލިތަކާއި، ސިކުނޑީގެ އޮޕަރޭޝަންގެ ހިމެނެ އެވެ. މިގެ އިތުރުން އެހެނިހެން ކަންކަމަށްވެސް ޒަކާތުފަންޑުން ވަނީ އެހީދީފަ އެވެ.