ކިންގު ސަލްމާން މިސްކިތުގައި ޤައުމީ އިސްލާމީ ލައިބްރަރީ ޤާއިމްކުރުމަށްޓަކައި ކުރަން ޖެހޭ މަސައްކަތްތައް މިހާރު ފަށާފައިވާކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.

އިސްލާމީ ކަންތައްތަކާ ބެހޭ ވުޒާރާއިން ފާއިތުވެދިޔަ 10 މަސްދުވަހުގެ ތެެރޭގައި ކުރެވިފައިހުރި ކަންކަން ހިއްސާކުރެއްވުމަށް މިއަދު ރައީސް އޮފީހުގައި ކުރިއަށްދިޔަ ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ވަޒީރު ވިދާޅުވީ، މީގެ ކުރިން އިސްލާމީ މަރުކަޒުގައި ޤާއިމްކޮށްފައިހުރި އިސްލާމީ ލައިބްރަރީ ފާއިތުވެދިޔަ އަހަރުތަކުގައި ބަންދުކޮށް، އެތަނުގައިހުރި ފޮތްތައް ގުދަންކޮށްފައިވާކަމަށާއި، މި ލައިބްރަރީ އަލުން ސަލްމާން މިސްކިތުގައި ހުޅުވުމުގެ މަސައްކަތް މިހާރު ކުރިއަށްދާކަމަށެވެ.

މި ލައިބްރަރީ 2025 ވަނަ އަހަރުގެ ޖަނަވަރީ މަހުގެ ކުރިން ހުޅުވުމަށް އަމާޒު ހިފާފައިވާކަމަށާއި، ރާއްޖޭގެ ހަ ރަށެއްގައި ޤާއިމްކޮށްފައިވާ އިސްލާމިކް ސެންޓަރުތަކުގައިވެސް އިސްލާމީ ލައިބްރަރީ ޤާއިމް ކުރުމަށްޓަކައި މަސައްކަތްތަކެއް ކުރައްވަމުން ގެންދަވާކަމަށްވެސް ވަޒީރު ވިދާޅުވިއެވެ.

Advertisement

މީގެ އިތުރުން ވަޒީރު ވިދާޅުވީ، އިސްލާމީ ލައިބްރަރީތައް ޤާއިމްކުރުމަކީ ރައީސް ޑރ. މުހައްމަދު މުޢިއްޒުގެ މެނިފެސްޓޯގައިވެސް ހިމަނުއްވާފައިވާކަމެއް ކަމަށާއި އެކަމަށް ވުޒާރާއިން ވަރަށް އިސްކަން ދެއްވާކަމަށެވެ.