ފެނަކަ ކުންފުނީގެ މަރަދޫފޭދޫ ބްރާންޗުން ގިނަ އަދަދެއްގެ ފައިސާތަކެއް ގެއްލުނު މައްސަލައެއް ފެންމަތިވެއްޖެ އެވެ.

އެނގިފައިވާ ގޮތުގައި އެ ބްރާންޗުން މިހާތަނަށް 400،000ރ. ގެއްލިފައިވެ އެވެ. އަދި މި މައްސަލަ ފެންމަތިވުމާ ގުޅިގެން އެތެރޭ ތަހުގީގެއް ވެސް ވަނީ ފަށައިފަ އެވެ. އެގޮތުން ގެއްލުނު ފައިސާގެ އަދަދު 400،000ރ. އަށް ވުރެ ގިނަ ކަމަށް ބެލެވޭތީ މިކަމާ ގުޅޭ ގޮތުން ބަލަން ޖެހޭ ކަންކަން އިތުރަށް އަންނަނީ ބަލަމުންނެވެ.

ފައިސާތަކެއް ގެއްލުނު މައްސަލައާ ގުޅިގެން ފެނަކަ މެނޭޖްމަންޓްގެ ބަހެއް ހޯދަން މިއަދު އެ ކުންފުނީގެ މީޑިއާ އޮފިޝަލަށް ގުޅުމުން ވިދާޅުވީ އެފަދަ ކަމެއް ހިނގައިގެން އުޅޭކަން އަދި އެނގިފައި ނެތް ކަމަށާއި ޖެހޭނީ އިތުރަށް ސާފުކުރަން ކަމަށެވެ.

Advertisement

ފެނަކައިގެ މަރަދޫފޭދޫ ބްރާންޗް ވަގުތީ ގޮތުން މިހާރު ހިންގަމުން އަންނަނީ މަރަދޫގަ އެެވެ. އެއީ މަރަދޫފޭދޫގައި ކުރިން އޮފީސް ހިންގަމުން އައި ތަނުގައި އާ އޮފީސް އިމާރާތް އެޅުމުގެ މަސައްކަތް މީގެ ތިން އަހަރެއްހާ ދުވަސް ކުރިން ފެށުމާ ގުޅިގެންނެވެ.

ހިތަދޫ އާއި ހުޅުމީދޫގައި ފެނަކައިގެ ބްރާންޗްތައް ހުރެ އެވެ.