ޝަޚުސު އޮޅުވާލައިގެން ވައިގެ މަގުން ރާއްޖެއަށް އެތެރެވާން އުޅުނު 3 މީހަކު މޯލްޑިވްސް އިމިގްރޭޝަނުން ހިފަހައްޓައިފިއެވެ.

އިމިގްރޭޝަނުން ބުނިގޮތުގައި މިދިޔަ ޖުލައި މަހާއި އޮގަސްޓް މަހުގެ ތެރޭގައި ރާއްޖެއަށް ވަގު ޕާސްޕޯޓް ބޭނުންކޮށްގެން އެތެރެވާން އުޅުނު 3 މީހަކު ހައްޔަރުކޮށްފައިވަނީ ވެލާނާ އިންޓަނޭޝަނަލް އެއާޕޯޓުންނެވެ.

މިގޮތުން ޖުލައި މަހުގެ 31 ވަނަ ދުވަހު ރާއްޖެ އެތެރެވާން އުޅުނު 25 އަހަރުގެ ފިރިހެނަކާއި އޮގަސްޓު 16 ވަނަ ދުވަހު 23 އަހަރުގެ ފިރިހެނަކު އަދި އޮގަސްޓު 18 ވަނަ ދުވަހު އުމުރުން 21 އަހަރުގެ ފިރިހެނަކު ހިފެހެއްޓި ކަމަށް އިމިގްރޭޝަނުން ވަނީ ހާމަކޮށްފައެވެ.

Advertisement

މި 3 މީހުންނަކީ ކޮން ޤައުމަކުން ރާއްޖެ އައި ބައެއްކަމެއް އިމިގްރޭޝަނުން ހާމަކޮށްފައެއް ނުވެއެވެ. ނަމަވެސް މި ތިންމީހުންވެސް ވަނީ އަނބުރާ ރާއްޖެއިން ފޮނުވާލާފައިކަމަށް އިމިގްރޭޝަނުން ސޯޝަލްމީޑިއާގައި ކުރި ޕޯސްޓެއްގައި ބުނެފައިވެއެވެ.

ރާއްޖެއަށް ވަގު ޕާސްޕޯޓުގައި ޝަޚުސު އޮޅުވާލައިގެން އެތެރެވުމަށް އެންމެ ގިނައިން މަސައްކަތް ކުރަނީ ރާއްޖެއިން އެކި މައްސަލަތަކުގައި ޑީޕޯޓްކޮށްލެވޭ ބިދޭސީންނެވެ.