މާލޭގައި ފަތުރުވެރިއެއްގެ ދަބަސް ވަގަށްނެގި މީހަކު ހައްޔަރުކޮށްފި އެވެ.

ފުލުހުން ބުނީ މެރީ ބްރައުންއާ ދިމާލުން ބޮޑުތަކުރުފާނު މަގު ބުރު މަތީގައި ޗައިނާއަށް ނިސްބަތްވާ 2 ފަތުރުވެރިއެއްގެ ދަބަސް، ހަނދާންނެތި ބޭއްވިފައި ވަނިކޮށް ގެއްލިފައިވާކަމަށް އިއްޔެ 19:12 ހާއިރު ރިޕޯޓުކޮށްފައިވާ ކަމަށެވެ.

މި މައްސަލައާ ގުޅިގެން ދަބަސް ހޯދުމަށް ގަލޮޅު ޕޮލިހުގެ ފުލުހުން ކުރި މަސައްކަތުން، ރޭ 22:15 ހާއިރު ދަބަސް ހޯދައި ވެރިފަރާތާ ހަވާލުކޮށްފައިވާ ކަމަށް ފުލުހުން ބުނެ އެވެ.

Advertisement

ދަބަހުގައި ހުރި ބައެއް ތަކެތި ހޯދާފައިވަނީ ވިއްކާލާފައި ވަނިކޮށް ކަމަށާއި، އޭގައި ހުރި ތަކެތީގެ ތެރޭގައި ލެޕްޓޮޕާއި ހާޑް ޑްރައިވް، ޕަވަރ ބޭންކުގެ އިތުރުން ޕާސްޕޯޓާއި އަންނައުނު އަދި އެހެން ބައެއް ތަކެތި ހިމެނޭކަމަށް ވެސް އޮފިޝަލް ފުލުހުން ބުނެ އެވެ.

މި މައްސަލައާ ގުޅިގެން ގދ. ތިނަދޫ، ރަންފަރު، އުމުރުން 41 އަހަރުގެ ޒަބީހް މުޙައްމަދު ނަމަކަށް ކިޔާ މީހަކު ވަނީ ހައްޔަރުކޮށްފަ އެވެ.

މި މައްސަލަ ފުލުހުން އަންނަނީ ތަހުގީގުކުރަމުންނެވެ.