މުވައްޒަފެއްގެ އިހުމާލުން ކަސްޓަމަރުންނަށް މާލީ އެއްވެސް ގެއްލުމެއް ނުވާނެ ކަމުގެ ޔަގީންކަން ބީއެމްއެލް އިން ދީފި އެވެ.

ބީއެމްއެލް އިން އެ ޔަގީންކަން ދިނީ އެ ބޭންކުގެ ކަސްޓަމަރުންތަކެއްގެ އެކައުންޓުން ވައްކަން ކުރި ކަމަށް މުވައްޒަފަކު އިއުތިރާފްވުމާ ގުޅިގެން ކްރިމިނަލް ކޯޓުން ކުރި ހުކުމަކާ ގުޅިގެންނެވެ.

މި މައްސަލައިގައި ކުށް ސާބިތުވެފައިވަނީ ބ. އޭދަފުށީ، ހިޔާވަހި، އަލީ މާޒިންގެ މައްޗަށެވެ.

Advertisement

ބީއެމްއެލް އިން ބުނީ 2021 ވަނަ އަހަރު ހިނގާދިޔަ މި މައްސަލަ ބޭންކަށް ފާހަގަވުމާއެކު ވަގުތުން އެ މުވައްޒަފު ވަޒީފާއިން އެކަހެރި ކުރި ކަމަށާއި މި މައްސަލަ ބެލިއިރު ބޭންކުގެ މުވައްޒަފު ވަނީ އޭނާ އަދާކުރާ ވަޒީފާގެ ގޮތުން ލިބިފައިވާ ބާރުގެ ބޭނުން ނަހަމަ ގޮތުގައި ހިފައި، ކަސްޓަމަރުންގެ އެކައުންޓުން ފައިސާ ނަގައި، އަމިއްލައަށް ބޭނުންކޮށްފައި ކަމަށެވެ.

އެ މައްސަލައާ ގުޅިގެން އެ މުވައްޒަފުގެ މައްސަލަ ޕޮލިހަށް ހުށަހެޅި ކަމަށާއި އަދި މިކަމާ ގުޅިގެން ކަސްޓަމަރުން އަތުން ގެއްލުނު ފައިސާ ވެސް އެ ކަސްޓަމަރުންގެ އެކައުންޓަށް ޖަމާކޮށްދީފައިވާ ކަމަށް ބޭންކުން ބުންޏެވެ.

ބީއެމްއެލްއިން ބުނީ، ބޭންކުގައި ހިނގާފާނެ ނުރަނގަޅު އަމަލެއް ނުވަތަ އިހުމާލެއް ދެނެގަތުމަށް ބޭންކުގެ ގަވައިދުތަކާއި އުސޫލުތައް ހަރުދަނާކޮށް، އިންޓާނަލް ކޮންޓްރޯލްތައް ބޭންކުގައި ގާއިމްކޮށްފައިވާ ކަމަށެވެ. އަދި އެއްވެސް މުވައްޒަފަކު ގަވައިދާ ހިލާފު ކަމެއް ކޮށްފި ނަމަ އެކަމެއް ތަހުގީގުކޮށް އަޅަން ޖެހޭ އެންމެ ހަރުކަށި ފިޔަވަޅު އަބަދުވެސް އަޅާނެ ކަމަށް ބީއެމްއެލް އިން ބުނެ އެވެ.

"މުވައްޒަފެއްގެ އިހުމާލުން ނުވަތަ ގަވާއިދާ ހިލާފަށް ކުރާ އަމަލަކުން ކަސްޓަމަރުންނަށް އެއްވެސް މާލީ ގެއްލުމެއް ނުވާނެ ކަމުގެ ޔަގީންކަން މި ފުރުސަތުގައި އަރުވަމެވެ،" ބީއެމްއެލް އިން ބުންޏެވެ.