ސިޔާސީ ޕާޓީތަކުގެ މެންބަރުންގެ ދަފްތަރުން ވަކިވުމަށް އޮންލައިންކޮށް ހުށަހެޅޭ ގޮތް އިލެކްޝަންސް ކޮމިޝަނުން ހަދައިފިއެވެ.

އިލެކްޝަންސް ކޮމިޝަނުން މިއަދު ކުރި އިއުލާނެއްގައި ބުނީ މާދަމާ އިން ފެށިގެން my.elections.gov.mv ޕޯޓަލް މެދުވެރިކޮށް ސިޔާސީ ޕާޓީތަކުގެ މެންބަރުންގެ ދަފްތަރުން ވަކިވުމަށް ހުށަހެޅޭނެ ކަމަށެވެ.

ސިޔާސީ ޕާޓީން ވަކިވުމަށް އެދި އިލެކްޝަންސް ކޮމިޝަނަށް ހުށަހެޅޭނެ ގޮތްތައް މީގެ ހަފްތާއެއް ކުރިން އިލެކްޝަންސް ކޮމިޝަނުން ގަވައިދަށް ގެނައި އިސްލާހަކާއިއެކު ވަނީ ފަސޭހަ ކޮށްދީފައެވެ.

Advertisement

އެ ކޮމިޝަނުން ސިޔާސީ ޕާޓީތަކުގެ ގަވައިދަށް ގެނައި ނުވަ ވަނަ އިސްލާހުގައި ބުނީ ޕާޓީން މެމްބަރަކު ވަކިވުމަށް އެދޭތާ 14 ދުވަހުގެ ތެރޭގައި އެ މީހަކު ޕާޓީން ވަކިކޮށްދޭން ޖެހޭނެ ކަމަށެވެ. އެ މުއްދަތުގެ ތެރޭގައި އެކަން ނުކޮށްދީނަމަ އިލެކްޝަންސް ކޮމިޝަނުން ކަނޑައަޅާ ނިޒާމުގެ ތެރެއިން ޝަކުވާ ހުށަހެޅުމުން އޭނާގެ ނަން، ޕާޓީގެ ދަފްތަރުން އުނިކޮށްދޭން ޖެހޭނެ ކަމަށް މިހާރު ގަވައިދުގައި ވަނީ ބުނެފައެވެ.

އެ ގަވައިދު ކުރިން އޮންނަގޮތުން، ޕާޓީން ވަކިކޮށްދިނުމަށް އިލެކްޝަންސް ކޮމިޝަނަށް ހުށަހަޅަންޖެހޭނީ ވަކި ހާއްސަ ފޯމަކުންނެވެ.

މިހާރު ގެނެސްފައިވާ އިސްލާހުގައި ބުނެފައިވާ ގޮތުގައި ކުރިން ހުރި ޕާޓީއަށް ނޭނގި އެހެން ޕާޓީއަކަށް ބަދަލުކޮށްފައިވާތީ، ކުރީގައި ހުރި ޕާޓީއަށް ބަދަލުވުމަށް އިލެކްޝަންސް ކޮމިޝަނުން ކަނޑައަޅާ ނިޒާމުގެ ތެރެއިން ހުށަހެޅުމުން ނޭނގި ރަޖިސްޓްރީކޮށްފައި އޮތް ޕާޓީން ވަގުތުން ވަކިކޮށް، ކުރިން ހުރި ޕާޓީއަށް އިލެކްޝަންސް ކޮމިޝަނުން އަލުން ވައްދައިދޭން ޖެހޭނެއެވެ.