ހުޅުމާލޭގައި ބިނާކުރުމަށް ހަމަޖެހިފައިވާ ތެލެސީމިއާ ހޮސްޕިޓަލް އެޅުމަށް މެލޭޝިއާ ކުންފުންޏަކާ ހަވާލުކޮށްފި އެވެ.

މިކަމުގެ އެއްބަސްވުމުގައި ސޮއިކޮށްފައިވަނީ ކުރިއަށް އޮތް 10 އަހަރަށް އެކުލަވާލި ތެލެސީމިއާ މާސްޓާ ޕްލޭން އިފުތިތާޙުކުރުމަށް ރޭ ކްރޮސްރޯޑްސް މޯލްޑިވްސްގައި ބޭއްވި ރަސްމިއްޔާތެއްގަ އެވެ.

މި ހޮސްޕިޓަލު ޕްރޮޖެކްޓް މެނޭޖްކުރުމަށް ހަމަޖެހިފައިވަނީ މެލޭޝިޔާގެ މެޑޯ އޭޝިއާ ކުންފުނިން އަދި ޗިންހިންގް ގްރޫޕުންނެވެ. އަދި މި ހޮސްޕިޓަލު އިމާރާތްކުރުމަށް މާލީ އަދި ފަންނީ އެހީތެރިކަން ފޯރުކޮށްދޭން ހަމަޖެހިފައިވަނީ ސައިނޯމާ އިންޖީނިއަރިން އިންޑަސްޓްރީގެ ފަރާތުންނެވެ.

Advertisement

ތެލަސީމިއާ ހޮސްޕިޓަލު ގާއިމުކުރަން ހަމަޖެހިފައިވަނީ ހުޅުމާލެ ދެވަނަ ފިޔަވަހީގަ އެވެ. މި ހޮސްޕިޓަލު ގާއިމުކުރަން އުރީދޫން 100 މިލިއަން ރުފިޔާގެ އެހީއެއް ސަރުކާރަށް ދޭން ނިންމާފައިވެ އެވެ. ސަރުކާރުން ބުނެފައި ވަނީ އެ ހޮސްޕިޓަލު ގާއިމުކުރަން 25 މިލިއަން ޑޮލަރު ހޭދަވާނެ ކަމަށެވެ.

މި ހޮސްޕިޓަލް ތަރައްގީ ކުރުމަށް ހަމަޖެހިފައިވަނީ ބޯން މެރޯ ޓްރާންސްޕްލާންޓު އޮޕަރޭޝަން ވެސް ކުރެވޭނެ ފެންވަރަށް އަދި ތެލަސީމިއާ އަށް ފަރުވާ ކުރަން ރާއްޖޭގެ ރަށްރަށުން އަންނަ ފަރާތްތަކަށް އެތަނުގައި ހުރެވޭނެ އިންތިޒާމްވެސް ހަމަޖެހޭ ގޮތަށް ކަމަށް ސަރުކާރުން ބުނެ އެވެ.

މީގެއިތުރުން މި ޖަލްސާގައި ވަނީ ތެލެސީމިއާ ބަލި ކޮންޓްރޯލް ކުރުމަށް އެކުލަވާލި 10 އަހަރުގެ މާސްޓާ ޕްލޭން ވެސް އިފްތިތާހުކޮށްފަ އެވެ. އެ މާސްޓާ ޕްލޭނުގައި މައިގަނޑު 7 ސިޔާސަތު އެކުލެވިގެންވެ އެވެ. އޭގެތެރޭގައި ޚިދުމަތުގެ ފެންވަރު މަތިކުރުމާ ދެވޭ ޚިދުމަތްތައް ހަރުދަނާކުރުމާއި، ތެލަސީމިއާއަށް ހޭލުންތެރިކަން އިތުރުކުރުމާއި، ވަށާޖެހޭ ސިޔާސަތުގެ ތެރެއިން ތެލަސީމިއާއަށް ރައްކާތެރިވުމަށް މަސައްކަތްކުރުމާއި، ޒަމާނާއި އެއްގޮތަށް ޚިދުމަތް ބައްޓަންކޮށް، ދެވޭ ޚިދުމަތުގެ ފެންވަރާ، ފަންވަރު ހިފެހެއްޓުމާއި، އިންފްރާސްޓްރަކްޗަރ ތަރައްޤީކުރުމާއި، ހިއުމަން ކެޕިޓަލް ޑިވެލޮޕްމެންޓް ހަރުދަނާކޮށް ވަރުގަދަކުރުމުގެ އިތުރުން ޚިދުމަތް ދިނުމުގައި ޓެކްނޮލޮޖީގެ އައު އީޖާދުތައް ތަޢާރަފްކޮށް ޚިދުމަތުގެ ފެންވަރު ހިފެހެއްޓުން ހިމެނެ އެވެ.