ނަޞްރުގެ ދުވަހުގެ ތަހުނިޔާ ކުރީގެ ރައީސް އަލްއުސްތާޛު މައުމޫން އަބްދުލްޤަައްޔޫމް ފޮނުއްވައިފިއެވެ.

ސޯޝަލް މީޑިއާގައި ކުރެއްވި ޕޯސްޓެއްގައި ކުރީގެ ރައީސް އަލްއުސްތާޛު މައުމޫން އަބްދުލްޤައްޔޫމް ވަނީ ދިވެހިރާއްޖޭގެ ފަޚުރުވެރި ނަޞްރުގެ ދުވަހުގެ އިޚްލާޞްތެރި ތަހުނިޔާއާއި ހެޔޮއެދުންތައް ރާއްޖޭގެ އެންމެހާ ލޮބުވެތި ރައްޔިތުންނަށް ފޮނުއްވަވާފައެވެ. އަދި ދިވެހިރާއްޖޭގެ ނަޞްރާއި ނަޞީބު އަބަދަށްޓަކާ ދެމެހެއްޓެވުން އެދި ދުޢާކުރައްވާފައެވެ.

އަލްއުސްތާޛު މަޢޫމޫން ޢަބްދުލްޤައްޔޫމް އަކީ 1988 ވަނަ އަހަރުގެ ނޮވެމްބަރު 3 ވަނަ ދުވަހު ރާއްޖެއަށް އުދުވާނީ ހަމަލާ ދިން އިރު ރައީސްއަކަށް ހުންނެވި ބޭފުޅެވެ. މި ހަމަލާއާ ގުޅިގެން ރައީސް މައުމޫން ވަނީ ދިވެހިންނާއި ޤައުމުގެ ރައްކާތެރިކަން ކަށަވަރުކުރެއްވުމަށްޓަކާ ބޭރުގެ އެކި ފަރާތްތަކުގެ އެހީތެރިކަމަށް އެދިވަޑައިގެން ވަގުތުން ފިޔަވަޅުތައް އަޅުއްވަން ފައްޓަވާފައެވެ. އެގޮތުން އެމަނިކުފާނު ވަނީ އިނގިރޭސިވިލާތް، އެމެރިކާ، ސިންގަޕޫރު އަދި އިންޑިއާ ފަދަ ޤައުމުތަކުގެ އެހީތެރިކަމަށް އެދިވަޑައިގެންފައެވެ.

Advertisement

މި ޤައުމުތަކުގެ ތެރެއިން އެންމެ ފުރަތަމަ ރާއްޖެއަށް އެހީތެރިކަން ފޯރުކޮށްދިނީ އިންޑިއާއިންނެވެ. ނަމަވެސް އިންޑިއާގެ އަސްކަރިއްޔާއިން ރާއްޖެ އައިރު ދިވެހި ސިފައިން ވަނީ ނަޞްރު ހޯއްދަވާ ބާޢީން ދިވެހި ބިމުން ފައްސާ ބޭރުކޮށްލާފައެވެ. އަދި ބާޢީންނާއި ކުރިމަތިލި ރަހީނުން ސަލާމަތްކޮށް ބާޢީން އިންސާފުގެ ކުރިމައްޗަށް ގެނެސްފައި ވަނީ އިންޑިއާގެ އަސްކަރިއްޔާގެ އެހީގައެވެ.