ދ. ކުޑަހުވަދޫގައި ދިވެހި ރައްޔިތެއްކަން އަންގައިދޭ ކާޑު ޕްރިންޓް ކުރުމުގެ ޚިދުމަތް ފަށައިފިއެވެ.

މި ހިދުމަތް އެ ރަށުގައި ފައްޓަވައިދެއްވާފައިވަނީ އެކަމަށް ހާއްސަކޮށް ކުރިއަށް ގެންދިޔަ ރަސްމިއްޔާތުގައި ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާންއާއި ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރެވެ.

އެ ރަސްމިއްޔާތުގައި މިނިސްޓަރު ވިދާޅުވީ ރައްޔިތުންނަށް ބޭނުންވާނެ ޚިދުމައްތައް އޭގެ އެންމެ ފުރިހަމަ ގޮތުގައި ފޯރުކޮށްދިނުމަށް ރައީސް އިސްކަންދެއްވާކަމަށާއި އެގޮތުން އައިޑީކާޑުގެ ޚިދުމަތް ރައްޔިތުންގެ ސަލާމަތާއި ރައްކާތެރިކަން ކަށަވަރުވާގޮތައް ވީ އެންމެ އަވަހަށް އަދި އެންމެ އުނދަގޫ ކުޑަ ގޮތަކަށް ޚިދުމަތް އަތޮޅުތެރެއިން ލިބޭނެ މަގު ފަހިކުރުމަށް ރައީސް އިރުޝާދުދެއްވާފައިވާކަމަށެވެ.

Advertisement

ކައުންސިލްތަކުން ރައްޔިތުންނާއި ގާތުން މަސައްކަތް ކުރާކަމީ ފާހަގަކޮށްލަން ޖެހޭކަމެއް ކަމަށާއި ކައުންސިލްތަކުން އިސްނަގައިގެން މި މަސައްކަތް ކުރަން ބޭނުންވާ ކަން ފާހަގަ ކުރައްވައި މިނިސްޓަރު ވިދާޅުވީ ބޭނުންވާ ބާރު ސްޕީޑުގައި އައިޑީ ކާޑު ޕްރިންޓު ކުރުމުގެ ހިދުމަތް ކުރިއަތް ނުގޮސްގެން އުޅެނީ މި މަސައްކަތަކީ ވަރަށް ޚަރަދު ހިނގާކަމަށްވުމުން ކަމަށެވެ. އަދި މި ހިދުމަތް ތައާރަފް ކުރުމުގެ މަސައްކަތް ކުރަމުންދަނީ ކައުންސިލްތަކުން އެދެމުން ދާ ތަރުތީބުން ކަމަށެވެ.

އައިޑީ ކާޑު، ޕްރިންޓް ކުރުމުގެ ޚިދުމަތް ކުޑަހުވަދޫގައި ފެށީ ދ. އަތޮޅު ކައުންސިލްގެ އެހީތެރިކަމާއެކުކަމަށާއި އެ ހިދުމަތް ދިނުމަށް ބޮޑު ހޭދައެއްވާއިރު، އެކަމަށް ބޭނުންވާ މެޝިނަރީޒް ލިބެމުންދާވަރަކުން ޚިދުމަތް ދިނުމަށް ފޯރުކޮށްދެމުންދާނެކަމަށް ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ބުނެއެވެ.

ދ. ކުޑަހުވަދޫގައި އައިޑީ ކާޑު ޕްރިންޓު ކުރުމުގެ މަސައްކަތް ފަށާފައިވާއިރު މިއީ މާލެ ފިޔަވައި އަތޮޅުތެރޭގައި އައިޑީ ކާޑު ޕްރިންޓް ކުރުމުގެ ޚިދުމަތް ފެށި ދެވަނަ ރަށް ކަން ފާހަގަ ކޮށްލެވެއެވެ. މި ޚިދުމަތް އަތޮޅު ތެރޭގައި އެންމެ ފުރަތަމަ ފަށާފައި ވަނީ ގއ. ވިލިނގިލީގައެވެ.