މާލެ ސަރަހައްދުގައި ދިރިއުޅޭ މީހުންނަށް ފްލެޓު ދޫކުރުމަށް ކުރީ ސަރުކާރުން ހިންގި 'ގެދޮރުވެރިޔާ' ސްކީމުން ފްލެޓު ލިބޭ މީހުންގެ ވަގުތީ ލިސްޓު އަންނަ ހަފްތާގައި އިއުލާންކުރާނެ ކަމަށް ހައުސިން މިނިސްޓަރު ޑރ. އަލީ ހައިދަރު ވިދާޅުވެއްޖެ އެވެ.

"ގެދޮރުވެރިޔާ ސްކީމު" ގެ ދަށުން ފުރަތަމަ ފްލެޓް ދޭން ނިންމީ 4،000 މީހުންނަށެވެ. އެގޮތުން ލިސްޓް އާންމުކުރުމާ އެކީ ގިނަ ޝަކުވާތަކާއި ކަންބޮޑުވުންތައް ފެންމަތިވި އެވެ.

ފުލެޓުތައް ދޫކުރުމުގައި މައްސަލަ އުޅޭ ކަމަށް ބުނެ، އެންޓި ކޮރަޕްޝަން ކޮމިޝަން (އޭސީސީ)ން ވެސް މައްސަލައެއް ބެލި އެވެ. އެ މައްސަލަ ބެލުމަށްފަހު މިދިޔަ ފެބްރުއަރީ މަހު އޭސީސީން ވަނީ ބައެއް ކަންތައްތަކަށް ރިއާޔަތްކުރުމަށް ފަހު ފުލެޓު ދޫކުރުމުގެ މަސައްކަތް ކުރިއަށް ގެންދަން ހުއްދަ ދީފަ އެވެ. ނަމަވެސް މިހާތަނަށް އައިއިރު ވެސް ފްލެޓްތައް ހަވާލުނުކުރާތީ ފްލެޓް ލިބުނު ފަރާތްތަކުން ދަނީ ތަކުރާރުކޮށް ކަންބޮޑުވުން ފާޅުކޮށް، ދޭތެެރެ ދޭތެރެ އިން އިހުތިޖާޖު ވެސް ކުރަމުންނެވެ.

Advertisement

ދައުލަތުގެ މީޑިއާގައި ރޭ ވާހަކަދައްކަމުން މިނިސްޓަރު ހައިދަރު ވިދާޅުވީ ހުރިހާ ފޯމްތަކެއް ރީއިވެލުއޭޓް ކުރުމަށްފަހު ކުރިއަށް އޮތް ހަފުތާ ތެރޭގައި ވަގުތީ ލިސްޓެއް އިއުލާންކުރާނެ ކަމަށާއި އަދި ޝަކުވާ އަށް ވެސް ހުޅުވާލާނެ ކަމަށެވެ. އަދި މި އަހަރު ނިމުމުގެ ކުރިން 4،000 ފްލެޓް ހައްގުވެރިންނަށް ހަވާލުކުރާނެ ކަމަށްވެސް ހައިދަރު ވިދާޅުވި އެވެ.

"ހުރިހާ ފޯމްތަކެއް ރީއިވެލުއޭޓް ކޮށްފައި އަޅުގަނޑުމެން ކުރިއަށް އޮތް ހަފުތާ ތެރޭގައި އިރާދަކުރެއްވިއްޔާ ވަގުތީ ލިސްޓެއް އިއުލާންކުރާނަން. ދެން ޝަކުވާގެ ފުރުސަތު ވެސް އަޅުގަނޑުމެން ހުޅުވާލާނަން،" ހައިދަރު ވިދާޅުވި އެވެ.

"ގެދޮރުވެރިޔާ" ސްކީމުން ފްލެޓް ލިބުނު މީހުންގެ ލިސްޓް އަލުން އިވެލުއޭޓް ކުރަމުންދާއިރު، "ބިންވެރިޔާ" ސްކީމްގެ ދަށުން ގުޅީފަޅުން ދޫކޮށްފައިވާ ގޯތިތަކުގެ ގުރުލުން ދާދިފަހުން ވަނީ ބާއްވާފަ އެވެ.