މިއަދުން ފެށިގެން ރާއްޖެއަށް ވޭޕް އެތެރެކުރުން މަނާވެއްޖެއެވެ.

ވޭޕް އެތެރެކޮށް އޭގެ ވިޔަފާރި ކުރުމާއި އެ ބޭނުން ކުރުން މަނާކުރުމަށް ދުންފަތް ކޮންޓްރޯލް ކުރުމާ ބެހޭ ގާނޫނަށް އިސްލާހު ގެނައުމުގެ ބިލު ރައީސް ޑރ. މުހައްމަދު މުއިއްޒު ތަސްދީގު ކުރެއްވި ބުދަ ދުވަހު އެވެ.

ވެރިކަން ކުރާ ޕީއެންސީ އަށް ނިސްވަތްވާ ހެންވޭރު އުތުރު ދާއިރާގެ މެންބަރު އަހުމަދު އައިފާން ހުށަހެޅުއްޗި އެ ބިލް ފާސްކޮށްފައި ވަނީ 54 މެންބަރުންގެ ވޯޓުންނެވެ. ބިލާ ދެކޮޅަށް އެއްވެސް މެންބަރަކު ވޯޓު ނުދެއްވި ނަމަވެސް ވަކި ގޮތަކަށް ވޯޓު ދެއްވަން ބޭނުންނުވާ ކަމަށް އަށް މެންބަރަކު ވޯޓުދެއްވި އެވެ.

Advertisement

މި މަހުގެ 6 ގައި ބޭއްވި ރައްޔިތުންގެ މަޖިލީހުގެ އިޖުތިމާއީ ކޮމިޓީގައި އެ ބިލަށް ވަނީ އިސްލާހުތަކެއް ވެސް ގެނެސްފައިވެއެވެ. އެ އިސްލާހުތަކުގެ ތެރޭގައި، އީ-ސިނގިރޭޓު އަދި ވޭޕް ކުރުމަށް ބޭނުންކުރާ އާލާތެއް ކުޑަކުއްޖަކަށް ވިއްކައިފި ނަމަ، އެ ފަރާތެއް 50،000ރ. އިން ޖޫރިމަނާ ކުރުން ހިމެނެ އެވެ.

ގާނޫނަށް މިއަދިން ފެށިން އަމަލު ކުރަން ފެށުމާ ގުޅިގެން ދެން ރާއްޖެ ވޭޕްކުރުމަށް ބޭނުންކުރާ ތަކެތި ރާއްޖޭގައި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، އިޝްތިހާރު ކުރުމާއި ހިލޭބެހުން މަނާވާނެ އެވެ.

ދުންފަތުގެ އިސްތިއުމާލު ކުރުމާ ދެކޮޅަށް މި ސަރުކާރުން އަޅަމުންދާ ފިޔަވަޅުތަކުގެ ތެރެއިން އެކްސްޕޯޓް އިމްޕޯޓްގެ ގާނޫނަށް ބަދަލު ގެނެސް، ސިނގިރޭޓާއި ބިޑިއަށް ނަގާ އިމްޕޯޓް ޑިއުޓީގެ ސްޕެސިފިކް ރޭޓް ވެސް ވަނީ މަތިކޮށްފަ އެވެ.