ސިޔާސީ މަގާމްތަކުގައި ތިބޭ ފަރާތްތަކުން ޝަރުއީ ދާއިރާ އަށް ނުފޫޒު ފޯރުވާކަން އެނގިވަޑައިގެންނަވާ ހިސާބުން، އެ މީހަކު ވަގުތުން މަގާމުން ވަކިކުރާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ.

ރައީސް މިހެން ވިދާޅުވެފައި ވަނީ އެމަނިކުފާނުގެ ސަރުކާރަށް އަހަރެއް ފުރުމާއި ގުޅިގެން ބޭއްވި ޖަލްސާގައި ވާހަކަފުޅު ދައްކަވަމުންނެވެ. އެމަނިކުފާނު ވިދާޅުވީ ވެރިކަމުގެ ހުވާ ކުރެއްވި ވަގުތުން ފެށިގެން ސިޔާސީ މީހުންގެ ފަރާތުން ޝަރުއީ ދާއިރާއަށް ނުފޫޒު ފޯރުވުން ނިންމަވާލެއްވި ކަމަށެވެ.

ރައީސް ވިދާޅުވީ މި ވަގުތު ސިޔާސީ މަގާމަކަށް އައްޔަންކޮށްފައިވާ އެއްވެސް ފަރާތެއް ޝަރުއީ ދާއިރާއަށް ނުފޫޒު ނުފޯރުވާނެކަމަށެވެ. އެހެންނަމަވެސް އެކަން އެގޮތަށް ކުރާނަމަ، އެކަން އަންގައިދިނުމަށް ރައީސް ވަނީ އެދިވަޑައިގެންފައެވެ. އޭރުން އެ މީހަކު ވަގުތުން މަގާމުން ވަކި ކުރާނެކަމަށް ވެސް ރައީސް ވިދާޅުވި އެވެ.

Advertisement

"ތިއިން އެއްވެސް ބޭފުޅަކު ރާއްޖޭގެ ރައްޔިތުން ގާތު އެދޭ ވާހަކައެއް މި ދަންނަވަނީ އެއްވެސް ރައްޔިތަކަށް އަޅުގަނޑު އައްޔަންކޮށްފައި ހުރި މީހެއް ޝަރުއީ ދާއިރާ އަށް ނުފޫޒެއް ފޯރުވާކަމަށް ފެނިވަޑައިގަންނަވަންޏާ އަޅުގަނޑަށް އެކަން އަންގާލަދެއްވާ. އެ މީހަކު ވަގުތުން ވަކިކުރާނަން. ކޮންމެ މީހެއް ވިޔަސް ވަކިކުރާނަން." ރައީސް މުއިއްޒު ވިދާޅުވިއެވެ.

އޭގެއިތުރުން ރައީސް ވިދާޅުވީ އެ މީހަކު މަގާމުން ވަކި ކުރުމަށް އަދަބު ދޭނީ ސިޔާސީ ވެގެން ނޫންކަމަށާއި އަދަބު ދޭނީ ނިޒާމުގެ ތެރެއިން ކަމަށެވެ.