ސަރުކާރު ހިންގާ މައި ޕާޓީ، ޕީޕަލްސް ނޭޝަނަލް ކޮންގްރެސް ޕީއެންސީގެ އެތެރޭގެ އިންތިޚާބު މާދަމާ ބާއްވަން ތައްޔާރުވެއްޖެއެވެ.

މި އިންތިޚާބު ރާއްޖޭގެ ހުރިހާ އަތޮޅެއްގައިވެސް ކުރިއަށްދާނެއެވެ. ހުރިހާ އަތޮޅެއްގައިވެސް އިންތިޚާބުގެ ވޯޓުލުން ކުރިއަށްދާނީ ހެނދުނު 10:00ން މެންދުރުފަހު 14:00އާ ހަމައަށް ކަމަށް ޕީއެންސީން މައުލޫމާތު ދެއެވެ.

ޕީއެންސީގެ އެތެރޭގެ އިންތިޚާބުތަކުގައި ޕާޓީގެ އިސް މަގާމުތަކަށް ބޭފުޅުން އިންތިޚާބުކުރުމަށް ހަމަޖެހިފައިވާއިރު ގިނަ ރަށްތަކުގައި އިންތިޚާބަކާނުލައި މަގާމުތަކަށް ބޭފުޅުން ވަނީ ހޮވިފައެވެ. މީގެ ތެރޭގައި ދާއިރާތަކުގެ ރައީސުންނާއި ނައިބުން ހިމެނެއެވެ.

Advertisement

މި އިންތިޚާބުގައި ރަށްރަށުގައި ވޯޓު ފޮށި ބެހެއްޓުމަށް ހަމަޖެހިފައިވަނީ އެ ރަށެއްގެ ސްކޫލް އިމާރާތުގައެވެ. އަދި މާލޭގެ ދާއިރާތަކާއި އަތޮޅުތަކުގެ ފޮށިތައް ދަރުބާރުގޭގައި ބަހައްޓާއިރު ހުޅުމާލޭގެ ދާއިރާތަކުގެ ފޮށި ރެހެންދި ސްކޫލުގައި، ވިލިމާލެ ދާއިރާގެ ފޮށި މުޙިއްޔުއްދީން ސްކޫލުގައި ބެހެއްޓުމަށް ވަނީ ނިންމާފައެވެ.

ޕީއެންސީގެ އެތެރޭގެ އިންތިޚާބު އިޢުލާންކޮށް، އިންތިޚާބުކުރާ މަޤާމުތަކަށް ކުރިމަތިލާން ހުޅުވާލީ މިދިޔަ ސެޕްޓެންބަރުމަހުގެ 11 ވަނަ ދުވަހުއެވެ. އިންތިޚާބަށް ކުރިމަތިލާން ހުޅުވާލި މުއްދަތު މިދިޔަ މަހުގެ 24 ވަނަ ދުވަހު ވަނީ ހަމަވެފައެވެ.

މި އިންތިޚާބު ވާނީ މިހާތަނަށް ރާއްޖޭގައި ސިޔާސީ ޕާޓީއަކުން ބާއްވާ އެންމެ ބޮޑު އިންތިޚާބަށްކަމަށް ޕީއެންސީން ބުނެއެވެ. އެގޮތުން މި އިންތިޚާބުގައި ޖުމްލަ 2095 މަޤާމަކަށް މެންބަރުން އިންތިޚާބުކުރާނެކަމަށް އެ ޕާޓީން ބުނެއެވެ.

އިންތިޚާބުކުރާ މަޤާމުތަކުގެ ތެރޭގައި ދާއިރާތަކުގެ ރައީސުންނާއި ނައިބުރައީސުން އަދި ރަށްރަށުގެ ޒުވާނުންގެ ހަރަކާތުގެ ރައީސުންނާއި ރަށްރަށުގެ އަންހެނުންގެ ހަރަކާތުގެ ރައީސުންނާއި ސްޓިއަރިން ކޮމިޓީތަކުގެ މެންބަރުން ހިމެނެއެވެ.