ރާއްޖެއިން އެއާޕޯޓްސް ޓެކްސް ބޮޑުކުރުމާ ގުޅިގެން ސްރީ ލަންކަން އެއާލައިންސްގެ ޓިކެޓްގެ އަގު ބޮޑުކޮށްފި އެވެ.

އަވައްޓެރި ސްރީ ލަންކާގެ ގައުމީ އެއާލައިން އިން ރާއްޖޭގެ ދެ އެއާޕޯޓަކަށް ޝެޑިއުލް ދަތުރުތައް ބާއްވަ އެވެ. އެއީ ރާއްޖޭގެ މައި އެއާޕޯޓް ކަމަށްވާ ވެލާނާ އިންޓަނޭޝަނަލް އެއާޕޯޓް (ވީއައިއޭ) އާއި އައްޑޫ ގަން އެއާޕޯޓަށެވެ.

ސްރީ ލަންކަން އެއާލައިންސްގެ ރާއްޖޭގެ އޭޖެންޓް އޭސް އޭވިއޭޝަން ސާވިސެސް މޯލްޑިވްސް އިން ބުނީ އެއާޕޯޓް ޓެކްސް އަށް ގެނައި ބަދަލާ އެކީ ދެ އެއާޕޯޓުން ވެސް ކުރާ ދަތުރުތަކުގެ އަގު އަންނަ މަހުގެ 1 އިން ފެށިގެންް ބޮޑުވާނެ ކަމަށެވެ. އެގޮތުން ގަން އެއާޕޯޓުން ފުރާ ބޭރު މީހުންނަަށް އިކޮނޮމީ ކްލާހުގެ ޓިކެޓެއް އަންނަ މަހުގެ 1 އިން ފެށިގެން ވިއްކާނީ 50 ޑޮލަރުގެ ޓެކްސް ހިމަނައިގެންނެވެ. އެއީ ޓެކްހަށް ގެނައި ބަދަލާ އެކީ އިތުރުކުރި 20 ޑޮލަރާ އެކީގަ އެވެ.

Advertisement

އަދި ގަމުން ދިވެހިންނާއި ބޭރު މީހުންނަށް ވެސް ބިޒްނެސް ކްލާހުގެ ޓިކެޓެއް ވިއްކާނީ އަންނަ މަހުގެ 1 އިން ފެށިގެން 120 ޑޮލަރުގެ ޓެކްސް ހިމަނައިގެންނެވެ. އެއީ އިތުރުކުރި 60 ޑޮލަރާ އެކީގަ އެވެ.

ވީއައިއޭ އިން ބޭރު މީހުންނަށް ސްރީ ލަންކަންގެ އިކޮނޮމީ ކްލާހުގައ ދަތުރު ކުރެވޭނީ 100 ޑޮލަރުގެ ޓެކްހަކާ އެކީގަ އެވެ. އެއީ އަލަށް އިތުރުކުރި 40 ޑޮލަރާ އެކީގަ އެވެ. އަދި ބިޒްނެސްގައި ކްލާހުގައި ދިވެހިންނާއި ބޭރު މީހުންނަށް ދަތުރު ކުރެވޭނީ 240 ޑޮލަރުގެ ޓެކްހަކާ އެކީގަ އެވެ. އެއީ އިތުރުކުރި 120 ޑޮލަރާ އެކީގަ އެވެ.

އެއާޕޯޓް ޓެކްހަށް ގެނައި ބަދަލާ ގުޅިގެން ސްރީ ލަންކަން އެއާލައިންސްގެ ޓިކެޓްގެ އަގު ބޮޑުކުރި އިރު، ކުރިން ދަތުރު ކުރަމުން އައި އަގުގައި ދެން ދަތުރު ކުރެވޭނީ މި މަހުގެ 30 ގެ ކުރިން ނަގާ ޓިކެޓަށެވެ.